Enstagl da far urden e dismetter tut ils documents – ch'han sa rimnà durant ils ultims decennis – ha il magister pensiunà e passiunà per musica, Curdin Brunold, decis da crear in cudesch ordlonder. Il resultat è ina survista da l’istorgia da las musicas instrumentalas en l'Engiadina, Samignun, Val Müstair, il Valposchiavo e la Bregaglia. En tut 200 paginas per rumantsch, tudestg e talian ha il cudesch.
26 festas da musica
Sco fil cotschen per il cudesch ha Brunold duvrà las 26 festas da musica en la regiun dapi il 1850. Illustrà cun numerusas fotografias, documents e protocols dat el uschia in’invista en il svilup da las differentas societads da musica sur ils onns. Cumenzà cun quella da Samedan – fundada dal 1850, pia la pli veglia societad en il district da musica 1 – sur numerusas uniuns che n’existan oz betg pli. Enfin in sguard sin l’avegnir cun las musicas da giuvenils è part dal cudesch.
-
Bild 1 von 9. Il cudesch da Curdin Brunold cumpiglia illustraziuns e documentaziuns sin 200 paginas. Bildquelle: RTR.
-
Bild 2 von 9. Pès bletschs per la musica da Segl dal 1920. Bildquelle: RTR.
-
Bild 3 von 9. documents che Curdin Brunold ha chattà en archivs, bibliotecas e collecziuns privatas. Bildquelle: RTR.
-
Bild 4 von 9. Giacumin Morell, il dirigent da festa a Susch dal 1949. Bildquelle: RTR.
-
Bild 5 von 9. La musica da Ramosch l'emprima giada ad ina festa da musica, a Samedan. Bildquelle: RTR.
-
Bild 6 von 9. Betg a mintgina da las 26 festas è vegnida valitada la prestaziun da las musicas cun notas. Bildquelle: RTR.
-
Bild 7 von 9. Fotografia da musicants da la societad da La Punt Chamues-ch. Ella n'exista betg pli. Bildquelle: RTR.
-
Bild 8 von 9. Inauguraziun da la bandera da la Musica Concordia Müstair dal 1932. Bildquelle: RTR.
-
Bild 9 von 9. Curdin S. Brunold è levgià d'avair en maun sia ovra en la quala el ha investì passa dus onns lavur. Bildquelle: RTR.
Ina documentaziun dal passà
Cun ses cudesch veglia Curdin Brunold surtut era preservar l’istorgia da las musicas. Ellas duain restar a mintgin en memoria e betg ir en emblidanza.
La vernissascha dal cudesch «istorgia da las musicas instrumentalas 1850-2020» ha lieu la sonda, 1. da zercladur 2024, a las 14:30 en la chasa da scola ad Ardez.