Tenor tradiziun vegnan ils Krampus ensemen cun Son Niclà a far visitas als uffants. Dapi in pèr onns però datti era cortegis da Krampus. Quels cortegis cumenzian adina suenter ils dis da Son Martin e duran fin en il temp d'advent. In tal cortegi cun il num «Night of hell» ha gì lieu sonda passada a Lana, Tirol dal Sid.
Da la partida èn stads var 750 Krampus dal Vnuost, dal Trentin, da l'Austria e da la Germania – en tut 34 gruppas da Krampus.
Krampus svizzer
Da la partida a quest cortegi era er Arno Fliri da Müstair. Ch'in Svizzer sa participeschia a questa tradiziun è plitost insolit. Arno Fliri fa quai dapi ch'el è in uffant. Tras ses bab che è dal Tirol dal Sid è el s'infectà cun il virus da Krampus e dapi lura investescha el mintga minuta libra en ses hobbi.
Sia emprima mascra da Krampus ha Arno Fliri fatg cun 11 onns. Però dapi var dus onns entaglia el mascras da Krampus in pau pli professiunalmain. In curs d'entagliar n'ha el mai fatg. Igl è plitost in pau in empruvar ed emprender or da sbagls.
