Offertas da la bassa
Suenter la decisiun da mardi saira èsi chapibel ch’il persunal da l'Ospital d'Engiadin'Ota fa patratgas davart l'agen futur. Er per la presidenta da l'uniun grischuna dal persunal da tgira, Renate Rutishauser, èsi evident ch'ins va a la tschertga da novas opziuns da lavur. Las persunas emploiadas dovrian ina perspectiva. Per part sajan ellas forsa era sa domiciliadas là cun la famiglia.
Ins sto er sa dumandar: Co vai vinavant? Nua chat jau ina soluziun adequata? Porscha la regiun insumma anc insatge, nua che jau poss lavurar en il sectur che jau giavisch? U è forsa propi ina midada giu la Bassa ina alternativa valabla?
Tschertas collavuraturas e tscherts collavuraturs hajan numnadamain gia survegnì offertas da lavur da la Bassa. Renate Rutishauser di che l'attenziun mediala haja natiralmain manà tar quai che questa situaziun è enconuschenta e ch'ins è daventà attent sin quai en la Bassa ed ussa vuless ins gugent gudagnar questas persunas spezialisadas per sasez.
Vinavant di Renate Rutishauser che l'uniun grischuna dal persunal da tgira vegnia a s'engaschar per che las collavuraturas ed ils collavuraturs vegnian udids, ch'els survegnian ina vusch e ch'ins als porschia ina perspectiva. Ins saja gia en contact cun differentas persunas responsablas e cuntinuescha cun quai.
I na po gea betg esser che nus scolain qua tantas persunas dal fatg u las occupain per lung temp. E che nus las perdain lura! Gist en temps dal midament demografic che guarda or dramatic per il Grischun.
Il privel ch’il Grischun perda gist en temps da mancanza da persunal, collavuraturas e collavuraturs qualifitgads è numnadamain qua.
Era la Val Puschlav è pertutgada
Il destin da l'ospital Samedan pertutga er las valladas dal sid. Lez n'han dentant gì nagin pled en la votaziun. E quai saja stà d'acceptar, ha ditg Giovanni Jochum, il president communal dal Puschlav e president dal cussegl da fundaziun da l'ospital en la val.
Igl è cleramain democratic e quai vulan ins er acceptar sco vischnanca betg involvada. Ina tscherta intschertezza exista dentant, perquai ch'ins na sa betg tge ch'il plan B è.
L'ospital en il Puschlav ha ina cunvegna da prestaziun tant cun Samedan, sco er cun Cuira. Las proximas emnas vegnian ins uss ad examinar tge che resta anc da quai u nua ch'ins sto chattar autras schliaziuns. Per exempel ha Puschlav serrà avant tschintg onns la partiziun da parturir. Ed avant trais onns hajan ins er dà si la chirurgia ed anestesia. Sche quest'offerta svanescha uss er or da l'Engiadin'Ota, dettia in problem, ha Jochum agiuntà.
Ina mamma cun deglias na po betg viagiar dal Puschlav fin a Cuira.
Sur da quests cas hajan ins dentant gia discurrì cun il schef dal departament, agiunta Jochum. El quinta dentant cunquai ch'il chantun mantegnia in provediment da sanadad decentral en la regiun, spezialmain per mammas futuras.
Scuol sa prepara sin in «worst case»
Era il directur e schefmedi per anestesia e cas urgents a l'ospital a Scuol, Joachim Koppenberg, è preoccupà da la situaziun en l'Engiadin'Ota – il Na haja era consequenzas per els.
Tenor Koppenberg pudessi dar ch'il persunal desditga bainbaud la plazza da lavur ed uschia fiss i pussaivel ch'i dat gia durant la stagiun auta d'enviern problems en connex cun la purschida medicinala en l'Engiadin'Ota. Per questa situaziun vul il directur da l'ospital a Scuol esser pront.
Singulas annunzias sin plazzas da lavur ha Koppenberg gia survegnì, ma l'ospital Scuol ha gia dapi onns ina situaziun da plazzas da lavur fitg stabila.
Era per Scuol datti midadas
Purschidas da las partiziuns da radiologia e da la ortopedia ha Scuol retratg per part da Samedan.
Gugent avessan nus retratg enavant las purschidas da l'ospital Samedan, ma stuain ussa tschertgar alternativas.
Tenor infurmaziuns da Joachim Kppenberg èn ins en stretg contact per chattar soluziuns en vista a la stagiun d'enviern che stat davant porta.
Consternaziun en l'ospital a Samedan
Il di suenter la decisiun da trais vischnancas en Engiadin’Ota da dir Na a la nova cunvegna da prestaziun cun la fundaziun per il provediment da sanadad da l’Engiadin’Ota SGO, n’ha il persunal da l’ospital regiunal a Samedan betg cumenzà bain ses di da lavur. Malsegirezza e consternaziun – las emoziuns che regian. Era per il CEO ad interim Rolf Gilgen, è la notg stada curta ed el saja tutgà fermamain da la decisiun.
Questa damaun hai jau vis bleras larmas, quai è simplamain uschia. Igl è il di suenter, e l'entira chaussa sto anc sa sclerir.
Metter da la vart las malsegirezzas
Era tar la schefmedia da la pediatria, Cathrin Büchi di che la situaziun chaschunia gronds quitads. En ils discurs cun ses collavuraturs e sias collavuraturas haja ella percurschì grondas malsegirezzas. Intginas dad ellas ed els pondereschian er da encurrir in'autra plazza.
In scenari realistic è, che l’ospital e l’Engiadin’Ota vegnan a perder persunal qualifitgà en in temp, nua che quel manca gia.
Cathrin Büchli vul però vinavant s'engaschar per in bun provediment da sanadad, per ils uffants ed ils giuvenils. Disditgas dal persunal na sajan anc betg entradas, uschia il CEO ad interim da l’ospital regiunal a Samedan, Rolf Gilgen. Per el èsi cler, ch'i duai ir vinavant uschè ditg ch'ils meds èn a disposiziun.
Clinica Gut vuless porscher maun
Il plan dal cussegl da fundaziun da la SGO è da far en las proximas emnas discussiuns cun pussaivels partenaris per l'ospital regiunal. En quellas duai vegnir pli cler, nua che la via dal provediment da sanadad en Engiadin’Ota duai ir.
La Clinica Gut e l’Ospital chantunal a Cuira avevan gia inditgà ils 21 d’october 2025, da vulair porscher maun en il cas ch’i dess in Na a la cunvegna da prestaziun. La finamira principala saja da garantir in provediment da sanadad er en avegnir en Engiadin’Ota. Tenor il CEO Silvan Breitenmoser, saja uss dentant anc memia baud per circumscriver las pussiblas purschidas futuras.
En il center na stat betg da vulair crescher cun la Clinica Gut, prioritad ha uss il segirar il provediment da sanadad en Engiadin’Ota e quai a lunga vista.
Per quai dovria uss temp per elavurar cun tut ils partenaris involvids il plan. Quai pretendia fiduzia e pazienza da tut las vart. Silvan Breitenmoser haja er plaina chapientscha per ils quitads e las temas dal persunal da l’ospital regiunal a Samedan. El è dentant da buna speranza che las novas structuras vegnan a duvrar er collavuraturas e collavuraturs da l’ospital a Samedan.
L’Ospital chantunal a Cuira vul pigliar posiziun pir mez december, cura ch’ils detagls sajan enconuschents, uschia sia posiziun sin dumonda dad RTR.