Per Urs Cadruvi n'è la decisiun en l'Engiadin'Ota betg stada in «supergau». Ins haja stuì quintar cun quai che quest scenari pudess ir en vigur. En emprima lingia saja uss impurtant da mantegnair il persunal clav che quel restia, malgrà malsegirezzas, uschè ditg ch'i dat anc ina purschida.
Cooperar n'è betg in tema nov
Envers il plan B che stat il mument en discussiun ha l'expert d'ospitals ina tenuta positiva. Tenor el pudess questa cooperaziun tranter dus ospitals che porschan sanadad funucziunar. I saja ina soluziun ch'ins haja gia discurrì blers onns en Engiadin'Ota.
Igl è ina dumonda dals chaus che lavuran ensemen – lura po bler funcziunar.
Co che l'organisaziun da tschellas prestaziuns ch'èn colliadas cun l'ospital pudess guardar ora, sco per exempel il salvament, las chasas da tgira e la spitex è per el relativamain cler. Far ina purschida integrativa saja in concept da success, di Urs Cadruvi.
Ir ensemen cun auters partenaris che porschan il medem pudess esser la dretga via.
Per Cadruvi è era la gronda dumonda sche l'ospital a Samedan sto propi avair in'offerta uschè gronda. Il mument saja quai sco in kiosc, di el. Ins duaja ussa guardar, tge ch'ins dovria exnum e tge ch'ins possia laschar davent. Impurtant saja per l'ospital a Samedan ch'ins possia tractar cas urgents.
Cas che van per vita e mort che dovran ina svelta intervenziun. Per chaussas pli selectivas as po er ir a Cuira u Turitg.
Tuttina dovria in pachet attractiv per collavuraturas e collavuraturs sco per exempel per chirurgs. In chirurg che spetga mo sin trais operaziuns l'onn, na gudogn'ins betg per l'ospital da Samedan.
Sin la dumonda, sch'il chantun stoppia gidar en talas situaziuns e sch'el haja da far in concept, di el ch'il chantun haja definì in concept dapi l'onn 2017. En quel haja el scrit ch'ins veglia ina ferma medischina en las regiuns. Il chantun sez n'è dentant betg il proprietari, mabain savens fundaziuns. Perquai na po la regenza betg far bler en quest senn.
Il chantun ha mo ina pussaivladad – definir en tge ospital ch'i vegn fatg tge intervenziun.
D'excluder ch'i dettia anc ina giada in tal scenari na saja betg pussaivel. I dettia er auters ospitals che fan forsa er be tants cas per onn sco Samedan – numnadamain radund 2'500. Pli pitschen che l'ospital è e pli grev ch'i saja cun quellas tariffas da gudagnar daners per na scriver cifras cotschnas.