Il comité Poschiavo Viva è in moviment politic che s’angascha per temas socials e persistents en la politica regiunala. Il comité è preoccupà da la situaziun ord vista dals indigens. Ils trens èn pli che plains pervia da la purschida attractiva cun il num «Bernina Express».
Ils trens che arrivan la bun’ura da Tirano (Italia) èn plains, scolaras e scolars ma era giasts ch'abitan en la Val Poschiavo na chattan quasi nagin plaz da seser en il tren. Il medem purtret sa mussa era la saira.
La Viafier retica prevesa mesiras
Als responsabels da la Viafier retica è la situaziun enconuschenta. Tenor infurmaziuns dal directur Renato Fasciati preves'ins perquai da mobilisar dapli trens, plinavant era da collavurar meglier cun ils bus che traffitgeschan sur il Pass dal Bernina.
Actualmain ha la Viafier retica introducì la pussaivladad da reservar plazzas, ma quellas reservaziuns vegnan a custar tschintg francs. Per il comité Poschiavo Viva è quai ina provocaziun.
Davart la Viafier retica èsi vegnì signalisà da vulair chattar soluziuns ensemen cun las vischnancas da la Val Poschiavo.