Per l’emprima giada èn gista trais commembers da la famiglia Buzzetti da Samedan a la partenza dad ina da las tschintg cursas dal Bikemaraton Parc Naziunal. Entant che la mamma Christine Moritz Buzzetti è cun 23 giadas ina participanta rutinada, vegni ad esser ina premiera per il figl giuven, Cla Buzzetti.
Ensemen cun ses frar Men Buzzetti, parta el per la cursa da 33 km a Zernez cun arrivada a Scuol. Lur mamma ha da surmuntar 70 km cun partenza a Livigno.
Entant ch’il sport da bike è per ils dus pli vegls dad els insatge che collia, è Cla Buzzetti da la partida be ord ina raschun: la mamma haja vulì ch’el sa participeschia, uschè il giuven da 13 onns. Pli gronda ambiziuns han perquai er Men e Christine Buzzetti per lur cuosas, numndamain da cuntanscher ina plazza da podest en lur categoria.
La 24avla ediziun è sin buna via
Il termin dal Bikemaraton enturn il Parc Naziunal Svizzer è per bleras participantas e blers participants fix, quai demussan las annunzias. Actualmain èn registradas radund 1'400 persunas per absolver in dals tschintg trajects enturn il Parc Naziunal Svizzer. Il dumber maximal per realisar ina cursa segira è 1'500 ciclistas e ciclists.
Il comité d'organisaziun sut la batgetta da la presidenta dal comité Chantal Mayor è vidlonder da preparar las davosas lavurs. Pervia da la blera plievgia ils davos dis mettan ins pais sin la preparaziun dal traject sez.
Ils 30 avust ha lieu la 24avla ediziun nua che radund 500 voluntarias e voluntaris vegnan ad esser en acziun per porscher a las participantas ed als participants ina cursa nunemblidaivla. Unic l'aura è, tenor la presidenta Mayor, in factur intschert.
Jau sun gnervusa pervia da l'aura, l’organisaziun sezza è sin fitg buna via.
Nov lieu d’arrivada a Scuol
Pervia d'in plazzal amez la vischnanca da Scuol e l’arrivada vegnida spustada a Gurlaina, nua che la halla da glatsch sa chatta – gist dador Scuol. Tenor Chantal Mayor vegn l'arrivada er il 2026 esser a Gurlaina, uschia che quest’onn vegn ad esser gist ina prova generala.
Las rutas dal Bikemaraton
-
Bild 1 von 4. Il «Putér»: 47 km e 870 meters d'autezza. Bildquelle: RTR Grafica.
-
Bild 2 von 4. Il «Zernezer»: 33 km e 435 meters d'autezza. Bildquelle: RTR Grafica.
-
Bild 3 von 4. Ruta alternativa curta: 76 km e 1'630 meters d'autezza. Zernez - Zuoz - Scuol. Bildquelle: RTR Grafica.
-
Bild 4 von 4. Ruta alternativa lunga: 109 km e 2'800 meters d'autezza. Scuol - Zuoz - Scuol. Bildquelle: RTR Grafica.