Il bogn «Ovaverva» occupa schon pli ditg la vischnanca da San Murezzan. Il bogn Ovaverva a San Murezzan è avert pir dapi il 2014. Tuttina sto el uss vegnir renovà. Dapi l'onn 2018 vegn lavurà vid in'expertisa davart quel cas.
Actualmain spetg'ins anc adina sin la segirada da las cumprovas en connex cun ils donns vid l’edifizi Ovaverva. Quella n'è per il mument anc betg sin maisa. Il motiv perquai, uschia la suprastanza da San Murezzan: Las firmas pertutgadas duain avair fatg recurs.
Duas da las firmas pertutgadas manegian uss, che quai na constettia betg. Sco quai che l'advocat da las firmas scriva en ina communicaziun a las medias, haja la vischnanca sez retardà la procedura cun tschentar ulteriuras dumondas als experts
La suprastanza n'è betg stada cuntanschibla per prender posiziun en chaussa.
