In import bainquant sur 10 milliuns francs vegn il project da reconstrucziun «Bondo II» a custar dapli. Precis quant dapli n’è il mument anc betg pussaivel da dir, tenor il vicepresident e responsabel per l’infrastructura da la vischnanca Bregaglia Ueli Weber. Eran pussaivels custs supplementars gia vegnì supponids e communitgads en la radunanza da preventiv il november da l’onn passà, n'èn las calculaziuns ussa suenter las proximas publicaziuns da lavur betg mo sa verifitgadas, mabain mussan imports anc schizunt pli auts.
Uschia vegn «Bondo II» a custar enstagl dals 42 milliuns francs prevedids, bainquant sur 50 milliuns francs. Il motiv per quests custs supplementars sajan oravant tut la pandemia, la guerra en l‘Ucraina, ina surchargia en il sectur da construcziun e la chareschia.
Custs vegnan repartids tranter Confederaziun, chantun e vischnanca
Finanzià vegn il project «Bondo II» per dus terzs tras la Confederaziun ed il chantun Grischun. Vul dir ch’enstagl dals oriund 13 milliuns, vegn la vischnanca da Bregaglia a stuair purtar pli che 15 milliuns francs sezza. Custs che vegnan dentant finanziads per gronda part cun raps da donaziun, uschia era ils custs supplementars.
