La pitschna butia amez Tarasp porscha mangiativas e rauba dal mintgadi. Purtà e gestiunà vegn la butia dad ina cooperaziun. La suprastanza enturn la presidenta Cornelia Koch na vul betg pli sa metter a disposiziun per in ulteriur temp d’uffizi. L’actuala perioda finescha la fin dal 2025.
Mia motivaziun va enavos. Uss è temp ch'ina generaziun pli giuvna surpiglia il scepter.
Lavur pretensiusa
La cooperaziun n’è betg be responsabla per l’administraziun, ma era per la gestiun da la butia. Quai munta per tut la suprastanza blera lavur e temp. Mintga di dals sis dis che la butia è averta duess in u ina dad els trais esser pront dad ir en butia, per organisar la surfatscha da la butia, u per prender encunter las empustaziuns. E quai dovra temp, di la presidenta.
Chattar glieud per las incumbensas
Pli grev è tenor Cornelia Koch da chattar la glieud che surpiglia las lavurs pretensiusas. Il sustegn ed agid per las lavurs da mintgadi è grond en vischnanca. Differentas acziuns per donaziuns a favur da lur butia haja dà. Er ina gruppa da persunas saja pronta da siglir en e gidar per exempel ad emplenir las mangiativas en ils regals.
Nus empruvain da derasar che la cooperaziun dovra glieud che surpiglia responsabladad. La resonanza n'è betg gronda.
Speranza che la butia surviva
En il fratemp ha la Pro Tarasp, ina organisaziun per gidar a differents projects en vischnanca, inizià ensemen cun la cooperaziun in pitschen café en butia. Il gudogn vegn er da bun a la butia. Cun quest ed auters projects spera Cornelia Koch che la butia possia surviver era sur la fin da ses temp d’uffizi ora.
