Il Center da Sanadad da l'Engiadina Bassa è vegnì premià. Ina giuria ha surdà il Viktor Award da quai onn en la categoria da la «pli innovativa cooperaziun tranter professiuns da sanadad». Ina giuria ed il public han decidì ensemen quai la gievgia passada a Berna.
Sco il magasin da branscha Medinside scriva, na saja la purschida dal center betg nova. El haja gia bajegià dapi il 2007 sias structuras. Surprendent saja tenor la commembra da la giuria Regula Feldmann ch'il center porschia tut or d'in maun, praticas da medis, tgira, l'ospital e purschidas sco il bogn a Scuol. Quai saja unic en Svizra.
En la giuria èn stadas represchentadas persunalitads da la politica, da l'economia e da la branscha da sanadad. Per il premi han mez e mez quintà las vuschs dal public e las vuschs da la giuria.