En tut las vischnancas era la glieud preparada sin l’avertura areguard las mesiras cunter la pandemia. Tuts sa legran sin la nova libertad ed oravant tut sin la festa tradiziunala da Chalandamarz. A Ftan datti ina gruppa da lavur ch'organisescha tut ensemen. Tuts auter che la gruppa da musica hajan ins pudì organisar senza gronds problems, uschia il commember dal cussegl da scola, Curdin Florineth.
A Zernez, Susch e Lavin vegni a dar la festa usitada. Tenor il magister da la segunda classa a Lavin, Andrea Vital, èn ils uffants sco furmias, els spetgian cun brama sin il grond di. La mirveglia tgi che dastga purtar tge plumpa è gronda, ils uffants èn amez l’organisaziun.
Ed era quels da Valsot sa chattan amez l’organisaziun. La mainascola da Valsot Urezza Gottschalk ha constatà che oravant tut las chanzuns hajan patì ils davos onns. Ils uffants da las emprimas classas n'hajan betg gì la pussaivladad d'emprender quellas dals pli gronds.
Tuttina, il plaschair è grond e l’organisaziun sin la meglra via – il Chalandamarz po finalmain puspè avair lieu.