Encunter la dumonda da construcziun per la Chesa Faratscha a Schlarigna èn vegnids inoltrads dus recurs. Quai ha confermà il chanzlist Beat Gruber envers RTR. L’organisaziun per l’ambient «Helvetia Nostra» aveva gia annunzià avant duas emnas da ponderar da far recurs en chaussa.
Per proteger ils basegns dals indigens essan nus bunamain sfurzads da far recurs.
En in proxim pass ha la vischnanca da Schlarigna da tractar ils dus recurs en las differentas instanzas. Il chanzlist da Schlarigna fetschia quint cun ina procedura d’almain in mais.
Malgrà critica: a Schlarigna duai dar abitaziuns da luxus
Sco reacziun sin l'eco medial è la critica da pliras varts aveva la vischnanca da Schlarigna decretà ina zona da planisaziun sin il territori communal. Suenter che la vischnanca ha però approvà il december la lescha da promover emprimas abitaziuns, è quella puspè vegnida abolida.
En consequenza è la via per la construcziun d'abitaziuns da luxus a la «Chesa Faratscha» libra. Ils 11 da mars è vegnida publitgada la dumonda da construcziun. Vi dals plans sco tals da fabritgar abitaziuns da luxus n'è sa midà nagut – malgrà tutta critica.
Custs mo da cuvrir cun abitaziuns da luxus
Quai na fiss er betg stà pussibel, ha ditg Jörg Röthlisberger da la Neue Haus AG envers il schurnal regiunal da SRF e la Posta Ladina. Ils custs per sanar l'edifizi sajan simplamain memia auts e cun abitaziuns primaras na vegniss ins betg da cuvrir quels custs. La Neue Haus AG quinta ch'il project custa var 5 milliuns francs.
Nus na pudain betg far auter – il project sto vegnir realisà en questa furma
Als locataris e las locatarias vegnan ils motivs ad esser tuttina; els ston bandunar lur abitaziuns. Quai en in temp, nua ch'igl è gia grev da chattar abitaziuns. Er Jörg Röthlisberger è pertschert da questa situaziun. Per ils blers locataris hajan ins però gia chattà ina soluziun.
