Siglir tar il cuntegn
Inhalt

Engiadina Christian Jenny è il nov president communal da San Murezzan

Il chantadur, actur ed intendant dal Festival da Jazz surpiglia il prim da schaner 2019 il timun da la vischnanca mundana en Engiadin’Ota. Christian Jenny ha fatg 894 vuschs, entant ch’il president en uffizi, Sigi Asprion, ha cuntanschì 822 vuschs.

Legende: Video Reacziuns dal president nov e dal partent abspielen. Laufzeit 01:58 Minuten.
Or da Actualitad video dals 07.10.2018.

Ensemen cun ina gruppaziun da glieud giuvna èsi reussì a Christian Jenny da lantschar a curta vista sia candidatura e persvader entaifer be 8 emnas la maioritad dals votants da San Murezzan. Surtut il fatg che blers giuvens s’engaschan uss activamain per l’avegnir politic da la vischnanca, para d’avair mobilisà bleras persunas dad ir a l’urna.

Il suveran da San Murezzan ha gì dad ir duas giadas a l’urna per eleger il president communal per ils proxims quatter onns. Tar l’emprim scrutini avant 2 emnas aveva Jenny manchentà la maioritad absoluta per 5 vuschs.

Proxima runda en in’emna

Gia proxima dumengia han ils votants puspè dad ir a l’urna. Lura han els da decider cun l’elecziun da 4 candidats, tgi che vegn a seser en la suprastanza da San Murezzan cun il president novelegì. Actualmain èn en cursa 8 candidats.

Sper ils 4 effectivs:

  • Regula Degiacomi (PLD)
  • Michael Pfäffli (PLD)
  • Maurizio Pirolla (PCD)
  • Anita Urfer (senza partida)

Cumbattan er 4 novs candidats per in dals sezs en l’executiva da San Murezzan.

  • Martin Berthod (PPS)
  • Claudia Jann (New Generation, senza partida)
  • Reto Matossi (senza partida)
  • Beat Mutschler (PCD)

L’emprim scrutini per l’elecziun da la suprastanza è ils 14 d’october 2018.

RR novitads 12:00