Cun ses film «I Giacometti» ha la cineasta engiadinaisa Susanna Fanzun gì grond success l'onn passà. Il film è daventà il film documentar svizzer cun il pli grond success l'onn 2023. La dunna da Scuol lavura gia blers onns sco cineasta da films documentars.
Ses uffants èn cunquai creschids si circumdads da quest mund. Sia figlia – Lucia Parolini – ha gia da pitschna ensi adina puspè accumpagnà sia mamma tar filmadas u è stada sin sets cinematografics cun sia «tanta», la sora da sia mamma, che lavura sin sets da films fictivs. Uschia ha Lucia gia baud survegnì invista en ils differents munds da film.
Sia lavur ha en mintga cas er influenzà mai.
Ed uss – suenter avair lavurà sin blers differents sets, sco per exempel da la seria «Davos 1917» da SRF, ed avair vis las differentas lavurs ch'i dat en quest mund – ha ella decidì, ch'ella vul ir ina sumeglianta via sco sia mamma. Ella vul daventar reschissura. Perquai ha ella quest onn realisà ses emprim film. Ella ha scrit il script, ha mess ensemen ina crew cun amis ed amias, ha filmà durant dus dis – ed ha entaifer curt temp taglià il film curt. Cun quest film è ella s'annunziada ad ina scola da film.
Ella enconuscha las difficultads dal far films, damai ch’ella è creschida si cun mai e sa precis tge che quai vul dir. Uschia è quai propi ina decisiun bain ponderada ed jau chat cool ch’ella fa ussa quai ch’ella vul far.
Lucia e sia mamma han omaduas il sentiment, ch'ella saja preparada per la vita sco cineasta – cunquai ch'ella haja vis tut las varts da quella vita – cun esser creschida si tar sia mamma. Ella è pertscherta dal fatg, che la vita sco cineasta po esser magari dira en Svizra – ma Lucia n'haja simplamain nagin auter interess che saja uschè grond sco sia passiun per il far films.
