L’aual Spöl che curra tras il Parc Naziunal Svizzer è contaminà dapi in accident il settember 2016 cun PCB, ina substanza nuschaivla. Tgi ch'è culpabel per qust accident ch’è capità durant lavurs da sanaziun, n’è betg anc sclerì.
Il chantun ha ordinà il decret che las Ovras Electricas d’Engiadina hajan da sanar e purtar sez tut ils custs per la sanaziun dal Spöl. Quellas avevan fatg la proposta da surpigliar las lavurs da sanaziun dentant be sco prefinanziaziun. Uschia ch’ins po spartir ils custs sin tut ils culpabels.
Encunter l’interpresa ch'è spezialisada sin lavurs da protecziun encunter corrosiun è pendenta ina procedura penala.
Squitsch a Berna
Il cusseglier naziunal Jon Pult ha vulì savair dal Cussegl federal co el valiteschia la situaziun dal Spöl en Engiadina e sch’el è da l’avis che l'aual che curra tras il Parc Naziunal Svizzer avess da vegnir sanà pli sper pussibel. Gea, conferma la Confederaziun en sia resposta, ch’i sa tractia d’in problem e ch’ins avess da sanar urgentamain il Spöl.
Ultra da quai ha il cusseglier naziunal dal PS vulì savair daco ch’i na dettia betg ina valur maximala da restanzas da PCB en l’ambient. La Confederaziun saja vid examinar sch’ella vul introducir – sco i vala gia oz en l’agricultura – ina limita da valurs er en la protecziun da l’aua, uschia la resposta.
La posiziuns da las vischnancas
Las vischnancas da Valsot enfin S-chanf sco vischnancas concessiunarias profitan mintg’onn d’impurtantas entradas tras l'implant idraulic. Els retschaivan ils fits d’aua. Zernez e Scuol speran sin in dialog tranter ils pertutgads. S-chanf e Valsot èn dal parairi che sulettamain il culpabel duess stuair surpigliar la responsabladad.
