Mintga di traffitgan tschients da cunfinaris da l’Italia e da l’Austria en l'Engiadina – per ir a lavurar tar las pendicularas, en ospitals, hotels e bleras firmas. Sin dumonda han diversas interpresas confermà, che lur collavuraturs dal pajais vischin sajan vegnids a lavurar senza incaps.
Sulettamain en l'Engiadin’Ota han las pendicularas ed era in'interpresa da construcziun confermà, che lur collavuraturs sajan vegnids da sonda sin dumengia en Svizra. Quai per esser segir da pudair lavurar il glindesdi.
La situaziun a Livigno ha gì consequenzas per Zernez
Il decret talian ha sfurzà las pendicularas a Livigno da serrar lur implants. Sinaquai han fitg blers giasts pachetà las valischs ed èn arrivads en Engiadina. A Zernez eran ils hotels plains la fin d’emna passada. Entant è la situaziun sa normalisada là.
La situaziun en il Tirol dal Sid
Il Tirol dal Sid na tutga betg tar la zona cotschna decretada da la regenza taliana. Dentant funcziuna tut sco normal, auter che la scolas ch'èn serradas. Hotels e pendicularas èn però en stretg contact per trair mesiras a temp. Singulas regiuns prevesan d’esser solidaricas cun la Lombardia e da serrar hotels e pendicularas. Tenor infurmaziun dal biro dal president da la regenza da la provinza da Bulsaun succeda quai tut sin basa voluntara. In scumond sumegliant a quel da la Lombardia n'è actualmain betg vegnì communitgà.
La situaziun en il Tirol dal Nord
Tenor infurmaziuns da l’uffizi per relaziuns publicas da la regiun Tirol a Puntina/Innsbruck, prevesan els da far punctualmain controllas da sanadad sin il cunfin tranter l’Austria e l’Italia. Quai tant sin las vias ed autostradas, sco era sin las colliaziuns dal tren.
RTR actualitad 12:00
