Il manader da construcziun pendulescha dapi onns mintgadi tranter Chiavenna e l’Engiadina. Uss ch’ils cunfins èn serrads tranter la saira a las 20:00 e la damaun a las 05:00, haja el ensemen cun numerus auters cunfinaris da sa drizzar tenor quels uraris.
Senza in permiss da lavur G ed ina conferma ch’el haja gì da suttascriver, n’avess el nagina schanza da passar il cunfin, declera Valter Mengoli da Chiavenna.
Jau na sai betg, co ch’ils Milanais vegnan da passar il cunfin, sur notg è quel svizzer numnadamain serrà cun in giatter.
Las controllas a la duana quellas sajan mintgadi las medemas e tut ils cunfinaris hajan er da mussar mintga giada puspè ils documents. Pussibel saja che singulas persunas senza permiss da lavurar passian tuttina il cunfin, cun avair ina stgisa legala sco per exempel in cas urgent en famiglia.
Dus munds
Entant ch’il mund professiunal da Valter Mengoli n'è betg sa midà bler durant la lavur en Engiadina, è quel privat en Italia sa midà fermamain. Surtut ils passa dus mais che la glieud n'ha betg pudì ir ord chasa, hajan influenzà marcantamain la situaziun mentala da tut la populaziun en sia patria. El fetschia er gronds quitads areguard l’avegnir da l’Italia. La fom saja gronda ed il potenzial da revoltas creschia dad in di a l'auter.
Da principi è Valter Mengoli dentant optimist ed el spera perquai che la situaziun sa calma vers la stad.
