Dapi la primavaira da l’onn passà vegn construì il segund lai natiral da cumulaziun en il territori da skis Corviglia sur San Murezzan. A partir da la proxima stagiun d’enviern vegn uschè be anc duvrada l’aua dals lais per ennavar las pistas ed i na duai betg pli vegnir pumpà aua da fund si da la val.
Plazzal gigantic
Sin passa 2’600 meters sur mar vegn construì il Lej Nair Pitschen. Cun chavaterras, cupitgaders, zullas e bler lavur a maun vegn realisà quest lai. Il stgavament dal lai è per gronda part vegnì fatg cun siglientadas ed il material da stgav vegn deponì per ina reutilisaziun. Gista l’aura è ina gronda sfida sin quest'autezza. Numnadamain poi dar adina puspè naiv ed er il ferm vent impedescha tschertas lavurs. Enfin uss saja però tut i magari bain, ed Armon Godly, in dals responsabels per la construcziun, è da buna speranza da pudair terminar en var in mais las lavurs. L’entir lai ed er il conturn vegn modellà uschè natiral e persistent sco pussaivel.
Cura che las maschinas èn davent ed il lai è emplenì, na badian ins betg pli che quest lai è vegnì construì cun maschinas.
Il lai na duai betg be far serv l’enviern, er da stad duai el porscher in lieu da recreaziun a giasts ed indigens.
Senza aua na vai betg
L’onn 2015 avevan las pendicularas Engiadina San Murezzan Mountains SA construì l'emprim lai natiral, il Lej Alv, che sa chatta var 60 meters d’autezza pli bass ch’il Lej Nair Pitschen. Entant che quel ha ina capacitad da 420’000 m³ aua ed ina profunditad da 10 meters, accumulescha il lai Nair Pitschen var 300’000 m³ aua ed è 20 meters profund. Il volumen dal segund lai è mesirà uschia ch’i pon vegnir ennavadas quasi tut las pistas cun l’aua da tuts dus lais. In factur essenzial per pudair porscher pistas da skis en l’avegnir, è Armon Godly persvadì.
L’aua ch'emplenescha ils lais è aua da naiv da la Val Schlattain. Quella emplenescha sco emprim il lai Alv e da quel vegn l’aua pumpada en il lai Nair Pitschen. Armon Godly è persvas, ch’ils lais vegnan emplenids er en l'avegnir cun avunda aua. La naiv che vegn fatga tecnicamain va cun la primavaira numnadamain er en ils lais.
Renaturalisaziun sco punct central
Tar l’entira construcziun vegn mess pais sin la renaturalisaziun. Betg mo tar il lai sco tal, mabain er tar tut las lingias che vegnan tratgas tras il territori, tranter auter per forza electrica e communicaziun. Er quai è in’intervenziun en la natira e per stgaffir uschè svelt sco pussaivel puspè spazi vital per flora e fauna, na vegn la surfatga betg planada, mabain modellada uschè natirala sco pussaivel.
La construcziun dal Lej Nair Pitschen custa radund 15 milliuns francs. Sco Armon Godly di, fetschian ins quint da spargnar energia da var ina ura gigawatt forza electrica per onn. Quai correspunda a circa 250 chasadas.
