Il settember decida il suveran da Scuol tgi che duai surpigliar il presidi da Christian Fanzun. Candidar candideschan gist duas persunas: Aita Zanetti da l'Allianza dal Center e Reto Rauch da la Partida populara svizra.
Da la vicepresidenta vul Zanetti uss daventar presidenta
La deputada e presidenta dal Cussegl grond Aita Zanetti vul daventar presidenta communala da la vischnanca da Scuol. Dapi il 2019 è ella vicepresidenta e commembra da la suprastanza communala.
La suprastanza da l'Allianza dal Center Engiadina Bassa/Val Müstair ha nominà Zanetti per la successiun da Christian Fanzun ch'ha dà giu l'uffizi sin la fin da la perioda d'uffizi. Ella adempleschia las premissas necessarias per manar la vischnanca da Scuol. Zanetti ch'ha 52 onns viva a Sent nua ch'ella maina in bain puril ensemen cun ses um.
Per Rauch è necessaria ina midada
Er Reto Rauch vul quest post dal presidi da la vischnanca da Scuol. Quai ha el declerà or da las vacanzas en Norvegia a la Posta Ladina. Sco Rauch haja ditg, sentian ins la malcuntentientscha sin il sectur da mastergnanza e da construcziun. Quai mussia ch'i dovria ina midada en la vischnanca.
Jau sun en ina buna vegliadetgna per prender a mauns quai, sun motivà ed hai ina buna rait da contacts en vischnanca, en la regiun sco er a Cuira ed a Berna.
Er l'experientscha haja el, da manar affars en differents secturs. Rauch è da nov deputà dal Cussegl grond ed ha fatg il segund meglier resultat a Suot Tasna en las elecziuns dal matg.
Las elecziuns per il presidi communal a Scuol èn ils 25 da settember.
