Siglir tar il cuntegn

Header

audio
La festa per la pli auta grischuna Aita Zanetti a Sent
Or da Sport ed actualitad dals 29.08.2021.
laschar ir. Durada: 04:34 minutas.
cuntegn

Nova presidenta Cussegl grond Festa per Aita Zanetti a chasa a Sent

La pli auta Grischuna ha pudì cumenzar ses onn d’uffizi sco presidenta dal Cussegl Grond cun ina festa tradiziunala. Envidà a quella era tant la populaziun dal cumin da Scuol sco er las politicras ed ils politichers.

Aita Zanetti ha giudì surtut l’inscunter cun la populaziun sin la plazza da Sent. Quella era vegnida decorada cun bleras flurs, maletgs dals uffants enturn ils bigls e cun in aperitiv organisà da la societad da puras d’Engiadina Bassa.

Jau sun anc plain emoziuns e simplamain grata per tut.
Autur: Aita Zanetti Presidenta dal Cussegl Grond

En ina tenda sin la plazza da scola ha la festa per la pli auta Grischuna cuntinuà cun las parlamentarias ed ils parlamentaris envidads ed in gentar cuminaivel. Durant quel han ils presidents da las differentas partidas tegnì in pled per il di da festa. Dad ina vart per gratular a la nov-elegida, da l’autra dentant er sco tradiziun: per dar ina u l’autra piztgada a las cuntrapartidas u a singulas persunas. «Asens essas! U per dir anc pli general: portgs!», uschia il Cusseglier guvernativ Mario Cavigelli, sa referind sin ils surnums dals da Sent e da Scuol.

L’emprima parlamentaria Engiadinaisa che n’ha betg gì da far insatge cun il cartel.
Autur: Vera Stifler Parlamentara PLD

Aita Zanetti succeda a Martin Wieland

audio
Cussegl Grond: Intervista cun la nova presidenta Aita Zanetti
03:57 min, Actualitad dals 25.08.2021.
laschar ir. Durada: 03:57 minutas.

Mintgamai en la sessiun d'avust elegian deputadas e deputads lur presidi per in onn. A partir dad immediat presidiescha Aita Zanetti il Cussegl grond e succeda uschia a Martin Wieland (PLD). L'Engiadinaisa è pir la 7avla dunna en quest uffizi.

Entant che Aita Zanetti è enconuschenta en l'Engiadina Bassa, ha ella fatg il pass en la politica chantunala pir avant trais onns: Dapi lura represchenta ella il circul Suot Tasna en il Cussegl grond.

Sco deputada ha Aita Zanetti dentant surpiglià adina dapli incumbensas ed è vegnida elegida dacurt sco co-presidenta da la nova partida Allianza dal Center.

Aita Zanetti, Allianza dal Center

Avrir la box Serrar la box
Foto dad Aita Zanetti
Legenda: FMR
  • abita a Sent
  • ha 51 onns
  • pura e mamma da 4 uffants
  • dapi 2018 deputada en il Cussegl grond (circul Suot Tasna)
  • dapi 2019 vicepresidenta vischnanca da Scuol
  • co-presidenta da l'Allianza dal Center dal Grischun

Sco vicepresident han deputadas e deputads elegì  l'anteriur president da Tavau Tarzisius Caviezel (PLD) e quai cun 107 da 113 vuschs. El vegn cunquai en roda da presidiar il Cussegl grond l'onn 2022.

Tarzisius Caviezel, PLD

Avrir la box Serrar la box
Tarzisius Caviezel, PLD
Legenda: RTR
  • abita a Tavau
  • ha 67 onns
  • dapi 2020 president Uniun chantunala dals chatschaders da patenta
  • dapi 2014 deputà en il Cussegl grond
  • 2013 - 2020 landamma da la vischnanca da Tavau
  • 2007 - 2011 cusseglier naziunal

L'uffizi sco presidenta dal Cussegl grond cumpiglia d'organisar las sessiuns e da manar las debattas dal parlament. Plinavant èsi era in uffizi da represchentar il chantun Grischun a differentas occurrenzas.

RTR novitads 15:00

Artitgels legids il pli savens

Scrollar a sanestra Scrollar a dretga