Duas chasas e mez a l’ur da la vischnanca da Bever sa chattan sin il territori da Samedan. Per facilitar differents projects sco la renatiralisaziun dal flum Beverin ed era per diminuir l’administraziun vuleva la vischnanca da Bever far in'adattaziun dal cunfin e surpigliar las chasas ch’èn pertutgadas. Perquai ha la vischnanca da Bever fatg ina dumonda d’adattar ils cunfins cun la vischnanca da Samedan, ha declerà la presidenta communala Selina Nicolay.
20 fin 25 abitaziuns fissan pertutgadas
Tenor il president communal da Samedan, Gian Peter Niggli, na sappian ins betg, co ch’il cunfin è vegnì tratg, quai saja creschì istoricamain. La suprastanza da Samedan ha tractà la dumonda ed è vegnida a la conclusiun, ch'ils disavantatgs èn pli gronds ch'ils avantatgs. Trais motivs principals ha la suprastanza eruì: Samedan perdessia entradas da taglia, abitants ed abitantas sco era la pussaivladad da sviluppar il terren da fabrica. Perquai na vuless la suprastanza betg entrar en discussiuns cun Bever. Gian Peter Niggli, il president da Samedan ha d'ina vart encletga per la vischnanca da Bever, ma vesa dapli disavantatgs per sia vischnanca.
Per Samedan ha questa soluziun dapli disavantags. Perquai avain nus fatg la decisiun da betg pli persequitar vinavant quest tema.
La relaziun tranter Bever e Samedan saja per el vinavant amicabla.
Bever avess sa giavischà dapli
Per la vischnanca da Bever saja quai en urden che Samedan na tractia betg la dumonda. La presidenta communala Selina Nicolay avess stimà sche las duas vischnancas fissan tschantadas anc ina giada vid ina maisa.
Nus avessan giavischà, ch'ins avess fatg anc in pass enavant e discutà profundamain tut las chaussas pertutgadas.
Uschia vegnian era vinavant schliadas dumondas che pertutgan il terren a l’ur da Bever cun discurs e contracts bilaterals da las duas vischnancas.