Gian Peter Niggli, pur e deputà dal Cussegl grond ha survegnì 740 vuschs tar in pli absolut da 566 vuschs. Sia cuntracandidata, la socialdemocrata Franziska Preisig ha survegnì 372 vuschs. La participaziun a l'elecziun è stada tar 62.88%.
Niggli succeda a Jon Fadri Huder che ha demissiunà. Il deputà dal Cussegl grond è sa decidì da candidar per il presidi suenter che Franziska Preisig aveva annunzià ses interess per il post. La giurista da 47 onns, docenta a la scola speziala superiura da turissem a Samedan e mamma è medemamain commembra dal Cussegl grond. Ses plans sco nov president fissan stads da vitalisar il center dal vitg.
Gian Peter Niggli metta ses focus sco nov president plitost sin las finanzas. Suenter blers onns cun spargnar ha el la finamira da sbassar la taglia per che la vischnanca daventa puspè pli attractiva.
Suprastanza cumpletta
Elegida da nova en la suprastanza communala è Alice Bisaz cun il meglier resultat. Er part da la suprastanza fan ils suprastants fin uss Paolo La Fata, Silvano Manzoni, Gian Sutter ed Andrea Parolini. Medemamain da nov en suprastanza è Gian Reto Melchior ch'è stà fin uss commember da la cumissiun da gestiun.