La racolta è stada mediocra, dentant la gronda part dals purs na vuleva betg planscher. Uschia guarda era ora cun la fusiun da vallada ch’è vegnida decidida avant 11 onns ed è entrada en vigur il Bumaun dal 2019. La gronda part dals dumandads è cuntenta cun la fusiun e tira ina bilantscha positiva era sche betg tut n'è ussa meglier.
Il president communal da Val Müstair, Rico Lamprecht, manegia che quai dovria almain ina generaziun per ch'ina fusiun saja acceptada da tuts. El fa sez ina bilantscha positiva, vesa dentant che tut l’administraziun communala duess daventar anc pli schlanca, pli efficazia.
Istorgia burascusa
La fusiun da la vischnanca da la Val Müstair è stada l'emprima fusiun d’ina vallada cumpletta en Grischun. Ils 18 d’avrigl dal 2008 aveva votà la populaziun da 5 fracziuns cleramain per la fusiun (82,34%). Be ina fracziun, Lü, aveva votà cunter la fusiun. Quai cun 18 cunter 17 vuschs. La fusiun era cun quai refusada. In’emna pli tard hai lura dà ina votaziun da reponderaziun a Lü – questa giada cun in resultat da 30 vuschs Gea e duas abstenziuns.
La fusiun è entrada en vigur il Bumaun dal 2009. Il Grischun aveva quella giada anc 190 vischnancas. Ussa ha il chantun be pli 106 vischnancas e sco proxim, il 2020, vegnan a fusiunar Cuira cun Maladers.
Telesguard 17:40