I va per ina contribuziun da basa da 100'000 francs l'onn plus in import dad 8'000 francs per mintga atleta ed atlet l'onn. En tut dat quai in import da bun 350'000 francs l'onn, ha Rico Kienz, mainagestiun da la Regiun declerà ad RTR. La cunvegna da prestaziun vala per dus onns, per l'onn 2023/2024.
Ina segunda cunvegna han ils presidents refusà
La Regiun Engiadina Bassa Val Müstair ha en pli refusà ina cunvegna da prestaziun cun la vischnanca da Scuol, era en connex cun l'Institut Otalpin Ftan. En quella fissi ì per in import supplementar per mintga scolara e scolar da la regiun che frequenta il gimnasi.
La regiun ha decidì da fixar en la cunvegna da prestaziun in tetg da custs e da pajar per mintga scolara e scolar maximalmain 9'600 francs l'onn. Totalmain na duai l'import betg surpassar 250'000 francs l'onn. Quest import na basta dentant betg a l'Institut Otalpin per cuvrir il deficit. El ha perquai dumandà d'agumentar l'import sin 11'000 francs l'onn per scolara e scolar, totalmain 275'000 francs. Quai ha la regiun dentant refusà.
Per betg periclitar la cunvegna da prestaziun ha la suprastanza communala da Scuol entant signalisà ch'ella fiss pronta da surprender l'import restant, bun 1'500 francs per scolara e scolar l'onn. La balla è uss damai enavos tar la scola e la vischnanca da Scuol. Sch'ina cunvegna da prestaziun tranter l'IOF e la vischnanca da Scuol vegn a funcziunar po tenor Rico Kienz era la cunvegna cun la Regiun vegnir suttascritta.
