Jon Fadri Huder aveva annunzià ils 18 da matg 2020 da betg pli vulair candidar per in’ulteriura perioda a la testa da la vischnanca da Samedan. Quella ha el manà bunamain otg onns cun in pensum da 50%.
Sco che l’Engiadinais da 53 onns ha declerà ad RTR, na veglia el per il mument betg dir dapli davart ses plans per l'avegnir.
Tschertgà successiun via inserat
Ina cumissiun ch'è incumbensada da las partidas localas dad Ebnat-Kappel ha proponì Jon Fadri Huder per il presidi da la vischnanca da stgars 5’000 abitants. Las annunzias sin in inserat da la cumissiun sajan stadas numerusas, scriva il St. Galler Tagblatt. Jon Fadri Huder duai succeder a Christian Spoerlé che sa retira il settember da ses uffizi.
Previs è ch’il Samedrin sa preschenta a la populaziun l’avust.
Las tschernas communalas ad Ebnat-Kappel èn prevesidas ils 27 da settember 2020.