Siglir tar il cuntegn

Header

video
«Tavau» a Vulpera
Or da Telesguard dals 19.01.2023.
laschar ir. Durada: 3 minutas 56 Secundas.
cuntegn

«Davos» – film da SRF ed ARD Ina seria da drama cun sequenzas engiadinaisas

Il champ d’acziun resta Tavau, ma singulas sequenzas vegnan filmadas er a Vulpera in Engiadina. Vulpera è pli datiers al purtret istoric sco Tavau.

In november 2022 han ins cumenzà las lavurs da filmada a Rain dal Nord-Vestfalia en Germania, pli tard sin la «Schatzalp» a Tavau, vairamain il lieu central dal film «Davos». Actualmain vegn però filmà a Vulpera en Engiadina. Tenor il producent Stefan Eichenberger na datti a Tavau nagina plazza istorica che represchentescha la situaziun d’avant 100 onns, quella han ins chattà a Vulpera.

«Davos» – in film dal 1917

Ina tgirunza da malsauns Svizra cun il num Johanna Gabathuler lavura ord pajas durant l'emprima guerra mundiala. Ella turna en Svizra cun in uffant illegitim, ma quel vegn piglià davent dad ella. Per survegnir enavos l’uffant cumenza ella a collavurar cun agents da spiunascha da la Germania. Tuttenina daventa ella la persuna principala che decida tranter guerra e pasch.

Quest film vegn realisà en collavuraziun tranter SRF ed ARD e vegn a custar bunamain 15 milliuns francs. Il film è pensà per in public internaziunal.

audio
Seria da drama «Davos»
ord Actualitad dals 19.01.2023. Maletg: RTR
laschar ir. Durada: 3 minutas 21 Secundas.

Autur da l’istorgia è il Svizzer Adrian Illien dal chantun Zug. El è persvadì che questa seria en sis parts daventa in success, plinavant vesa el grondas parallelas cun il temp dad oz.

Tavau era durant la guerra mundiala in center d’inscunter da persunas che avevan grondas influenzas sin la guerra, plinavant eran ils onns 1918 fin 1920 ils onns nua che regnava la malsogna spagnola. Cun il WEF e cun la pandemia da corona dastgan ins senz’auter trair tschertas parallelas, uschia l’Autur Adrian Illien.

La seria en sis parts vegn emessa a partir da l'enviern 2023/24 sin SRF1.

RTR actualitad 17:00;

Artitgels legids il pli savens

Scrollar a sanestra Scrollar a dretga