Siglir tar il cuntegn

Header

cuntegn

Deliberà preventiv 2021 San Murezzan fa quint cun in minus da 3,6 milliuns francs

Il cussegl communal ha deliberà il preventiv 2021 da la vischnanca da San Murezzan per mauns dal suveran. Quel na vegn dentant betg a decider il december durant l'unica radunanza communala da l'onn, mabain a l'urna. Quai pervia da la situaziun da corona.

Suenter intgins midaments suenter l'emprima lectura dal preventiv ils 22 d'october fa il preventiv quint cun in minus da 3,6 milliuns francs l'onn 2021, tar investiziuns da 31,7 milliuns francs.

Surtut ina chaussa ha midà anc ina giada las cifras. Il parlament ha numnadamain refusà durant l'emprima lectura l'augment da la taglia d'immobiglias da 0,5 sin 0,75 promils, quai ch'avess manà ad in import supplementar da 1,35 milliuns francs. La situaziun actuala na saja betg l'endretga per in augment da taglia, uschia l'argumentaziun dal cussegl. Il pe da taglia e la tariffa da taglia d'immobiglias na vegnan betg augmentads.

Avegnir da las finanzas da San Murezzan

Durant la segunda lectura è il parlament vegnì fatg attent ina ulteriura giada sin la situaziun futura da las finanzas. Uschia ha la vischnanca previs per ils onns 2021-2025 investiziuns da 180 milliuns francs. Per realisar questas dovri dentant bainprest in augment da las taglias ed ulteriuras mesiras da spargn.

Vista sur il lai da San Murezzan sin la vischnanca, ils guauds èn mellans e sin las muntognas hai naiv.
Legenda: San Murezzan fa quint per l'onn 2021 cun in defizit da 3,6 milliuns francs. RTR, Selina Camichel

Ulteriuras decisiuns

Il parlament da San Murezzan ha stgaffì en sia sesida dals 12 da november 2020 ina nova plazza en l'uffizi da construcziun, ha elegì ina cumissiun da giuventetgna, ina per in concept cumplessiv da traffic ed ina per accumpagnar la sanaziun da la chasa da parcar Quadrellas. El ha era acceptà ina cunvegna davart la lavur da giuventetgna ed ina per integrar Silvaplauna en l'allianza da taglia San Murezzan.

audio
Per tadlar curt e cumpact
ord RTR Audio dals 13.11.2020.
laschar ir. Durada: 1 minuta.

RTR novitads 06:00

Artitgels legids il pli savens