Che la CEO da la destinaziun turistica Engiadina San Murezzan, Tina Boetsch banduna l'organisaziun suenter be 8 mais, ha surprendì ils presidents communals da la Regiun Malögia. Els pretendan perquai in rapport che duai sclerir ils motivs per la desditga.
Il rapport duai er mussar tge consequenzas ch'igl è tut tenor da trair.
Sco quai ch'il president da la Regiun Malögia, Andrea Gilli ha ditg envers RTR veglian ins savair concret tge ch'è capità. Ina analisa duai mussar tge consequenzas ch'i saja eventualmain da trair e tge ch'i saja tut tenor da midar. Ils resultats dal rapport duain esser sin maisa ils 4. da november. Lura duai vegnir decis ils proxims pass per la destinaziun turistica Engiadina San Murezzan.
La destinaziun veva communitgà il venderdi il prim d'october che Tina Boetsch bandunia la destinaziun sin agen giavisch. La raschun sajan differentas ideas ed opiniuns davart la collavuraziun tranter la CEO e l'organisaziun. La turistica da 45 onns veva cumenzà ses nov post suenter che l'anteriur CEO veva demissiunà pervia da dispitas cun il cussegl d'administraziun. Ad interim surpiglian ils ulteriurs suprantants las fatschentas operativas da la destinaziun turistica.
