Suenter 9 onns èn ils dis da jodlar Grischun turnads en Engiadina. Il cor da jodel engiadinais ha organisà quests dis per la musica a La Punt Chamues-ch. Ils dis da jodel Grischun festiveschan plinavant la 50avla ediziun da giubileum.
Blera preparaziun
Dapi in onn e mez è il comité d’organisaziun vid planisar. Per la presidenta dal comité, Stefanie Thöny, in temp, nua ch'ella ha emprendì bler.
Jau hai cumenzà da nulla. Uschia ha jau stuì emprender a metter tras mias ideas. La collavuraziun cun mias collegas en il comité ha però funcziunà stupent.
Il program ch'il comité ha organisà per ils radund 700 participants e participantas e per ils visitaders e visitadras cumenza la sonda en damaun cun in act d’avertura da l'uschenumnà «Jodlerdörfli» e cuntinuescha cun las preschentaziuns da chant en las duas baselgias da La Punt Chamues-ch.
Suenter datti in cortegi da las 42 furmaziuns annunziadas, cors, bitta binderas e da las tibas. E lura chantan tut ils preschents e las preschentas tradiziunalmain ina chanzun avant che far festa la saira.
Coro d'uffants aposta per il grond di
Dapi il matg s'inscuntran 19 uffants per exercitar per lur concert al di da jodladers Grischun. Il coro d'uffants è vegnì organisà bel ed aposta per quest di e che uschè blers uffants èn s'annunziads ed han gust vid il jodlar fa plaschair a las manadras, Malina Moos e Maja Buob. L'Engiadin'Ota aveva avant divers onns gia in coro da jodladers d'uffants, uss è quel vegnì reactivà. Planisà saja quest coro però sco project, ch'è atgnamain terminà cun il di da jodladers. Sch'igl existia però il gust ed il plaschair dals uffants sajan las manadras forsa prontas da trair vinavant il coro.