Siglir tar il cuntegn

Header

audio
L'entira discussiun: Maisa radunda davart spazi da viver per indigens
Or da Actualitad dals 12.02.2024. Maletg: RTR
laschar ir. Durada: 1 minuta 3 Secundas.
cuntegn

Discurs a la maisa radunda Co vinavant cun il spazi da viver per indigens?

Co è la situaziun actuala e tge pussaivladads datti en avegnir per stgaffir spazi da viver per indigens? A la maisa radunda han prendì plaz duas presidentas communalas, in secretari d'ina associaziun da proprietaris ed il co-president da la societad Anna Florin.

In tema spazi da viver per indigens è cumplex ed enorm individual – quasi en mintga vischnanca datti in in’autra situaziun. Perquai van er las ideas e las opiniuns davart las mesiras dapart.

video
Maisa rodunda: Co schliar il problem da la mancanza da spazi d'abitar?
Or da Telesguard dals 12.02.2024.
laschar ir. Durada: 3 minutas 34 Secundas.

A Puntraschigna prevesan ins da chattar proximamain soluziuns per stgaffir dapli spazi per indigens, di la presidenta communala Nora Saratz-Cazin. La vischnanca ha lantschà in questiunari per chattar ora ils basegns, passa 500 persunas han prendì part a l’exposiziun da cooperaziun.

Dapi dus onns datti in grond consens da la tematica, in tscherta conscienza per la dramatica da la situaziun.
Autur: Nora Saratz-Cazin presidenta communala Puntraschigna
Nora Saratz-Cazin
Legenda: Nora Saratz-Cazin RTR

Andry Niggli, cumpossessur dad in biro d’immobiglias e secretari da l’associaziun dals proprietaris en Engiadin’Ota ha fatg l’experientscha che las abitaziuns vegnan datas a fit enorm svelt ed ils pretschs èn sut squitsch.

Jau hai empruvà da declerar nossa vista, ma i sa tracta dad in tema difficil. Quai è cler a tuts.
Autur: Andry Niggli secretari da l'associaziun dals proprietaris Engiadin'Ota
Andry Niggli
Legenda: Andry Niggli RTR

La societad Anna Florin ha la finamira da chattar soluziuns che valan per tut la Svizra, oravant tut vulan els vegnir activs sin il nivel politic, ma era a la populaziun vulan els infurmar sur da las consequenzas da l’iniziativa e las consequenzas da la nova lescha da planisaziun dal territori.

Tut auter che dischillus, ma constatà ch'i dat anc blera lavur en l'avegnir.
Autur: Riet Fanzun co-president da la societad Anna Florin
Riet Fanzun
Legenda: Riet Fanzun RTR

La situaziun en Val Müstair è tut autra che quella en Engiadin’Ota. En la Val Müstair datti anc spazi da viver ed era la pussaivladad da fabritgar. Els avessan anc parcellas ed era divers clavads per surfabritgar, di la presidenta communala Gabriella Binkert-Bechetti.

Mintga vischnanca sto chattar si'atgna soluziun, perquai che mintga vischnanca ha in'atgna situaziun.
Autur: Gabriella Binkert-Bechetti presidenta communala Val Müstair
Gabriella Binkert-Bechetti
Legenda: Gabriella Binkert-Bechetti RTR

Facit dal discurs

Chattà l'ov da Columbus n'han ins betg durant la discussiun tranter las duas presidentas communalas, il secretari da l’associaziun da proprietaris ed il co-president da la societad Anna Florin. Dad ina vart spetgan ins in tschert sustegn dal Chantun, ma da l’autra vart ha mintga vischnanca da guardar individualmain co schliar la problematica. Gist Puntraschigna è vidlonder ad analisar soluziuns cun il questiunari. Ils resultats da quella procedura vegn pussaivlamain er ad esser in instrument da basa per autras vischnancas e regiuns.

RTR actualitad 11:00

Artitgels legids il pli savens