La via dal Pass da l'Umbrail n'è betg pli segira. L'aua da la plievgia ferma glindesdi ils 28-08 ha derschentà or plira crappa dal mir da sustegn da la via.
La via sin il mir è gia sa sbassada per plirs centimeters, scriva il chantun. Pervia da quai saja i necessari da construir in mir da sustegn da betun cun ancras d'atschal. Las lavurs han cumenzà ils 4 da settember e cuzzan segir enfin ils 29 da settember.
Ils 27 da settember ha l'Uffizi da construcziun bassa valità da nov la situaziun e dà liber il pass a partir dals 30 da settember a las 17:00. Fin lura resta la via serrada per tut il traffic.
Pitschen retard pervia da plirs facturs
Ils motivs ch’il pass avra per pli tard èn divers. Per l'ina hai dà in retard cun las perfuraziuns per las ancras d’atschal. La geologia saja difficila e latiers haja dà dis cun urizis ed inundaziuns in zic pli grondas. Quellas hajan retardà las lavurs da segirezza, sco il schef dal circul 4 Scuol tar l'Uffizi da construcziun bassa Rafael Da Silva ha ditg.
L'entschatta da las lavurs eri planisà d'avrir il Pass da l'Umbrail ils 23 da settember, uss sa stauscha quella data per radund in'emna.