Christian Jott Jenny n'è betg culpant d'avair cuntrafatg al dretg d'autur. Quai ha decidì la dretgira districtuala da Turitg. Il president da vischnanca da San Murezzan, survegn uss enavos 25'000 francs per ils custs d'advocat.
Renfatschas
La procura publica aveva renfatschà a Christian Jott Jenny d’avair midà texts da chanzuns e quai senza dumandar ils artavels da l’autur. I va per las uschenumnadas «Trittligass-Balladen» da Werner Wollenberger, ch’è gia mort il 1982. Jenny era sco iniziant cun ses «Amt für Ideen» producent responsabel da l'entira producziun.
Arguments
Jenny ha argumentà ch'i saja stà ina parodia ed er visibla sco tala per il public. Per far parodias na dovri tenor lescha nagina lubientscha. Ultra da quai n'haja el betg midà sez ils texts. El sez saja stà iniziant cun ses «Amt für Ideen» producent da l'entira producziun.
Cunter la sentenzia po anc vegnir fatg recurs.