Siglir tar il cuntegn

Header

audio
Bondo: La bova da l'avust 2017 saja stada previsibla
Or da Actualitad dals 23.04.2021.
laschar ir. Durada: 04:51 minutas.
cuntegn

Dumonda da responsabladad Bova da Bondo saja stada previsibla

La bova da Bondo da l'avust 2017 che ha chaschunà 8 unfrendas, saja stada previsibla. In geolog extern engaschà dal chantun per observar il Cengalo haja gia 10 dis avant la catastrofa scrit in mail a l'Uffizi da guaud e privels da la natira che quai saja da quintar cun ina bova. Quai scriva il Beobachter en sia ediziun actuala. En il mail dal geolog extern stat scrit vinavant ch'el cusseglia d'installar in radar per observar il Cengalo e da serrar la via da viandar tras la val Bondasca.

Pauc pli tard èn represchentants dal chantun sco er il geolog extern ch'ha avertì il chantun, sgulads al Cengalo per intercurir la situaziun. Il chantun ha sinaquai decidì ch'i na saja tuttina betg necessari da serrar la via. Pertge quai e pertge ch'er in radar n'è betg vegnì installà na po il chantun per il mument betg respunder, cunquai ch'i sa tracta dad ina procedura currenta. I resta dentant la dumonda: avess il chantun pudì evitar la mort da las 8 persunas cun en quai mument serrar la via?

La vischnanca n'ha betg vesì il mail

En l'artitgel dal Beobachter ha la schurnalista Stefanie Hablützel er fatg retschertgas tar la vischnanca da Bondo. L'anteriura presidenta da Bondo e cussegliera naziunala Anna Giacometti na savevia nagut dal mail ed haja agì tenor l'expertisa geologica dal chantun. Schebain ella avess cun vesair il mail serrà la via tras la val Bondasca? Quai na po nagin respunder. Tge ch'è dentant uss anc da respunder è, sche insatgi è responsabel per l'accident e sche gea, tgi che quai è. «La procura publica sto uss sclerir cun guardar sin tut ils fatgs quellas dumondas – per l'ina avain nus numandamain ils dus experts dal chantun sco er il geolog che avevan enconuschientscha da quai mail, dentant er lur schefs enfin tar il cuesseglier guvernativ Mario Cavigelli», di la schurnalista.

Tribunal federal dictescha

Dà l'impuls a la schurnalista Stefanie Hablützel da sfundrar danovamain en las retschertgas ha ina sentenzia dal Tribunal federal dal favrer passà. Il Tribunal federal pretenda en quella da la procura publica dal Grischun, ch'ella s'occupeschia anc ina giada dals eveniments al Cengalo. La procura publica era suenter sia emprima expertisa vegnida tar la conclusiun, che nagin portia la responsabladad per l'accident ed aveva mess il cas ad acta. Ils parents da las unfrendas han fatg recurs cunter quella decisiun enfin al Tribunal federal e survegnì raschun.

Sche la procura publica fa las novas examinaziuns cun ina persuna fal fatg externa n'ha ella anc betg decidì, sco ella di sin dumonda. Experts da l'artitgel dal Beobachter vegnan dentant tar la conclusiun, che quai fissi necessari da laschar intercurir il cas d'ina persuna independenta. Sco basa per metter il cas ad acta era la procura publica numnadamain sa referida sin l'uffizi per guaud e privels da la natira, il medem uffizi che aveva recumandà a la vischnanca da Bondo da betg serrar la via tras la val Bondasca.

Ord l'archiv:

RTR novitads 17:00

Artitgels legids il pli savens

Scrollar a sanestra Scrollar a dretga