Siglir tar il cuntegn
cuntegn

Engiadina «Edy» ha in dachasa – almain ina part dad el

La sculptura da lain gigantesca, ch'è stada il star dals Campiunadis mundials, vegn en mauns privats.

Legenda: Guardar il video «Edy» – plaunet a la fin da si'odissea. Durada 02:30 minutas.
Or da Telesguard dals 06.12.2018.

Exact 22 mais suenter il grond di d’avertura dals Campiunadis mundials il favrer 2017 ha la societad «Save Edy» chattà ina soluziun per Edy – u almain per il chau dad Edy. Il corp ha stuì vegnir dismess.

Dus firmas da Samedan acquistan il chau

Andri Freund da Samedan è il stgaffider da la sculptura dad «Edy». Ensemen cun l’impressari Gian Andrea Duttweiler è el i en tschertga dad in lieu a Samedan. Actualmain sa rechatta il chau tar la firma F. Duttweiler SA a Samedan.

Il lieu exact, nua ch'il chau dad «Edy» vegn lura definitivamain plazzà, n’è dentant anc betg enconuschent – ma enfin il pli tard la primavaira 2019 vegn quel ad esser enconuschent.

La societad «Save Edy» vegn schliada

Radund 100’000 francs ha ramassà la societad per pudair salvar «Edy». La gronda part è vegnida duvrada durant ils 22 mais passads per transports, giurists e blers scleriments.

Dal rest dals raps ha la societad anc da decider definitivamain. Tenor il president da la societad datti duas variantas da duvrar quels raps: Sustegnair l’idea dals dus affarists u dar enavos ils raps als fauturs – e suenter vegn la societad schliada per dal bun.

RR actualitad 17:20