Adriano Iseppi è il nov president communal da San Murezzan. En il segund scrutini è Iseppi vegnì elegì cun 582 da 1'462 vuschs valaivlas. Quai communtigescha la vischnanca. Iseppi vegn a surpigliar l'uffizi il schaner 2027.
Per Iseppi sajan ils ultims mais stads fitg intensivs. Quatter mais e mez ha durà ses cumbat electoral, perquai che annunzià sia candidatura aveva el gia il mars. Uschia saja el tant pli levgià che quest temp intensiv, questa «cursa», saja ussa passà – e quai cun success.
Questa cursa è stada lunga, uschia è er il levgiament grond.
Avant che Iseppi po dentant surpigliar ses nov post il schaner, han l'atun anc lieu las elecziuns dals gremis, pia da la suprastanza, dal parlament e da la cumissiun da gestiun. Quai è tut glieud che lavura la finala ensemen cun el sco president. Influenzar questa elecziun na veglia el dentant betg, di Iseppi. El n'haja era tar si'atgna elecziun betg stgalinà tar mintga porta, di el envers RTR. Tuttina sajan quests posts fitg decisivs. Perquai veglia el ils proxims mais ir sperasvi tar ils gremis, sentir in pau il puls ed eruir tge che funcziuna e tge betg.
Jau vi lavurar 100%, u er in pèr pertschient dapli.
Insatge che Iseppi vul far auter che ses antecessur Christian Jott Jenny saja d'esser pli preschent en la vischnanca. El veglia esser a San Murezzan ed en chasa communala mintga di. Quai muntia era dad auzar il pensum sin 100% - il pensum da Jott Jenny munta a 80%. Uschiglio di Iseppi d'avair grond respect da quai che Jott Jenny ha fatg ils ultims otg onns.
- L'um da 53 onns viva cun sia famiglia a San Murezzan.
- Dus onns è Iseppi stà il schef dal passlung tar Swiss-Ski. Dapi il 2016 è el manader da la cursa tar il Maraton da skis engiadinais.
- Adriano Iseppi vul porscher in'alternativa al pievel. El vul proseguir cun ils projects gia instradads e s'engaschar per ina buna finanziaziun da quels. Ed era esser qua per la populaziun indigena.
Iseppi suonda a Christian Jott Jenny che n'ha betg pli candidà per ina ulteriura perioda d'uffizi. Jenny è stà president dapi il 2019 ed era vegnì reelegì il 2022.
Contrahents cun differentas raschuns per trumpada
Ils contrahents e la contrahenta dal president novelegì èn trumpads dal resultat da l'elecziun dal presidi da San Murezzan. Isabel Wenger ha pers vuschs vers l'emprim scrutini, Leandro Testa avess tuttina spetgà da far dapli vuschs, era sch'el è vegnì en concurrenza pir en il segund scrutini. Sebastian Bahner ha en omadus scrutinis fatg l'ultim plaz.
Or da l'archiv:
In discurs che RTR ha fatg l'onn 2009 en il rom da l'emissiun Tavulin:
