Michael Pfäffli sorta da l’executiva da San Murezzan. Il politicher da la PLD - che n’è betg pli vegnì reelegì dumengia - sa retira per immediat.
Quai communitgescha la vischnanca en ina curta infurmaziun. La substituziun da Michael Pfäffli en il gremi saja reglada fin la fin da quest onn. Tenor artitgel 4 en la constituziun communala na datti nagina elecziun substitutiva.
Envers RTR n'ha Michael Pfäffli betg vulì prender posiziun. L'um da 60 onns fascheva part dapi l'onn 2014 a la suprastanza communala da San Murezzan. Dapi l'onn 2006 represchenta il liberaldemocrat er l'Engiadin'Ota en il Cussegl grond ed ha presidià quel l'onn 2016/17.
Nagin donn per PLD
Il president da la Partida liberaldemocraticaEngiadin’Ota, Thomas Nievergelt, relativescha la terrada da la partida tar las elecziuns a San Murezzan. Envers RTR na vul el era betg discurrer d’in debachel.
En emprima lingia saja d’engraziar a las persunas per lur lavur. Ultra da quai dettia anc adina bleras persunas che s’engaschian e surpiglian responsabilitad en differents gremis en l'Engiadin’Ota per la PLD. Il resultat a San Murezzan saja finalmain la veglia dal suveran e quel valia da respectar.
PLD betg pli en suprastanza
Cun las elecziuns communala da dumengia hai dà ina gronda roschada en l'executiva da San Murezzan. La populaziun ha elegì ina nova suprastanza communala:
- Reto Matossi (Gruppa independenta) cun 814 vuschs
- Gian Marco Tomaschett (PPS) cun 802 vuschs
- Christoph Schlatter (senza partida) cun 679 vuschs
- Prisca Anand (senza partida) cun 638 vuschs
Betg elegids èn cunquai gist dus politichers da la Partida liberaldemocratica:
- Regula Degiacomi (PLD) cun 613 vuschs
- Michael Pfäffli (PLD) cun 582 vuschs
- Claudia Aerni (next Generation) cun 443 vuschs
La raschun è segir ils svaris avant las elecziuns communalas, cun il resultat che Prisca Anand e Christoph Schlatter èn sortids da la Partida liberaldemocratica ed han candidà sco independents.
