Siglir tar il cuntegn

Header

Legenda: RTR
cuntegn

Resultats da vischnancas Da presidis e suprastanzas fin a credits e rachetas

RTR porscha ina survista da las pli impurtantas decisiuns en las vischnancas.

Nagin credit supplementar per «La Nars» a Surses

Ils da Surses dincun 57,6% Na al credit supplementar da 1,1 milliun francs per l’Arena da sport La Nars a Savognin. La vischnanca aveva argumentà ch'ils 4,5 milliuns ch'il suveran ha concedì il mars na vegnian betg a tanscher per realisar il project. Il motiv saja la chareschia ed en spezial pli auts custs per material da construcziun. La radunanza communala aveva deliberà il credit - a l'urna ha il suveran uss ditg Na.

Aita Zanetti nova presidenta da Scuol

Il duel tranter ils dus Sentiners è decidì: Aita Zanetti da l'Allianza dal Center è la nova presidenta communala da Scuol. Ella ha survegnì 1'068 vuschs – la maioritad absoluta è stada tar 976 vuschs. Ses cuntracandidat Reto Rauch (PPS) ha survegnì 836 vuschs.

Ils da Scuol han acceptà cun 79,22% la revisiun parziala da la lescha da polizia. I va tranter auter per scumandar fieus artifizials e rachetas. Questa midada aveva la vischnanca proponì sin basa d'ina moziun inoltrada il schaner. Insumma vegn la lescha da polizia precisada en plirs puncts, per exempel er il scumond da campar suenter il cas avant Tribunal federal.

Ultra da quai ha la populaziun elegì ina nova suprastanza communala. Elegids èn:

  • Curdin Thomas (Ardez) cun 1058 vuschs
  • Fadri Blanke (Ftan) cun 1097 vuschs
  • Fadri Häfner (Guarda) cun 996 vuschs
  • Dario Giovanoli (Scuol) cun 936 vuschs
  • Chasper Alexander Felix (Sent) cun 1042 vuschs

Vacant resta il sez da Tarasp en la suprastanza communala.

Marcus Beer president da Ilanz/Glion

Marcus Beer è il nov president communal da Ilanz/Glion. Il candidat senza partida ha survegnì 896 vuschs – ses cuntracandidat Claudio Quinter da l'Allianza dal Center ha survegnì 801 vuschs.

San Murezzan ha elegì la suprastanza

La populaziun da San Murezzan ha elegì ina nova suprastanza communala:

  • Reto Matossi cun 814 vuschs
  • Gian Marco Tomaschett cun 802 vuschs
  • Christoph Schlatter cun 679 vuschs
  • Prisca Anand cun 638 vuschs

Pius Giger resta president da la Tumleastga

Pius Giger resta vinavant president communal da la Tumleastga – uss era per la perioda 2023-26. El ha cuntanschì 498 vuschs. La maioritad absoluta era 389 vuschs. Ses cuntracandidat Othmar Caviezel n'ha cun 249 vuschs betg survegnì avunda sustegn. Pius Giger era pir dapi il schaner president communal da la Tumleastga e successur da Werner Natter.

Plinavant ha la Tumleastga elegì quatter commembers per la suprastanza:

  • Matthias von Blumenthal cun 711 vuschs
  • Ursula Tscharner-Bernold cun 612 vuschs
  • Daniel Torri cun 603 vuschs
  • Marina Keller cun 509 vuschs

Il tschintgavel candidat Dietegen von Planta n'è betg vegnì elegì (282 vuschs).

Zezras tschertga vinavant in nov president

Nagin dals candidats ha cuntanschì la maioritad absoluta per la successiun dal president communal Peter Lang. Ils candidats eran Eugen Arpagaus (Allianza dal Center), Benjamin Hefti (PPS) e Daniel Freund (senza partida). Perquai sto in segund scrutini decider tgi che daventa president communal da Zezras.

Quai èn las novas suprastantas ed ils novs suprastants da Zezras:

  • Beatrice Schweighauser cun 500 vuschs
  • Daniele Martinetti cun 422 vuschs
  • Michael Monsch cun 399 vuschs
  • Bruno Derungs cun 376 vuschs

Poschiavo ha elegì ses podestà

Il vegl president communal è era il nov: Giovanni Jochum (PLD) resta il «podestà» da Poschiavo. Plinavant han ils Puschlavins era elegì trais commembers da la suprastanza:

  • Davide Vassella cun 793 vuschs
  • Fulvio Betti cun 754 vuschs
  • Michel Castelli cun 750 vuschs

La fin da november vegn lura anc elegida ina quarta persuna en la suprastanza.

Zernez ha elegì ina nova suprastanza

Il suveran da Zernez ha elegì sis persunas en la suprastanza communala - quels sis ch'eran sa mess a disposiziun:

  • Riet Denoth cun 410 vuschs
  • Simon Rohner cun 389 vuschs
  • Armando Roner cun 362 vuschs
  • Irma Tognini cun 360 vuschs
  • Duosch Städler cun 346 vuschs
  • Jürg Wirth cun 344 vuschs

Sco president communal era Domenic Toutsch gia vegnì elegì il matg.

Nova suprastanza per Bever

Fadri Guidon è vegnì reelegì sco president communal. Elegids en suprastanza èn:

  • Samuel Schäfli cun 154 vuschs
  • Franco Duschén cun 153 vuschs
  • Marco Fluor cun 148 vuschs
  • Beat Fried cun 136 vuschs

Ils dus suprastants d’enfin qua – Marcello Giovanoli e Felix Karrer – n’han ils da Bever betg reelegì.

Cuira ha approvà il credit per «Cuira Vest»

Ils da Cuira han approvà cun 74,74% il credit da 20,7 milliuns francs per la staziun «Cuira Vest» che duai vegnir pli gronda. Ina nova staziun moderna duai remplazzar la fermada dal tren actuala. En tut muntan ils custs a 60,8 milliuns francs e l'avertura da la nova staziun è planisada per la stad 2026.

Plinavant ha il suveran ditg Gea ad ina contribuziun annuala da maximalmain 521'000 francs a l'uniun «Rait per spazi cultural». Questa uniun è responabla per metter a disposiziun locals da prova e d'inscunter per teater, saut, musica, litteratura etc. Gia l'onn 2010 avevan represchentants da la cultura inoltrà ina petiziun cun passa 2'500 suttascripziuns e fatg attent ch'i manchia spazi cultural a Cuira.

Lantsch sa protegia cunter aua gronda

Ils da Lantsch han approvà il credit da 4,6 milliuns francs per mesiras da protecziun cunter aua gronda a Val Tgiertschen e Runcalatsch. La charta da privels ch'è vegnida surlavurada mussa in privel per il territori abità, tranter auter tras las bovas da Runcalatsch e Val Tgietschen. En omadus lieus datti gia rempars da protecziun che tegnan enavos la glera, quels ston dentant vegnir adattads.

Trun scumonda fieus artifizials e traplas fotograficas

Ils votants e las votantas han approvà quella cun var 73% da las vuschs. La lescha da poliziaprevesa tranter auter in scumond da fieus artifizials per proteger ils animals, minimar il privel d'incendis ed evitar rument. La vischnanca vul era far urden cun rulottas che van a far vacanzas si culm, quai enten definir plazzas da campar. Plinavant scumonda la lescha da polizia activitads sco segar u autras lavurs enturn chasa durants ils dis da ruaus publics e locals. Per garantir la protecziun da datas duain era traplas per fotografar animals selvadis vegnir scumandadas sin terren public.

Schiers dat glisch verda a l'areal d'industria

Ils da Schiers han ditg Gea a la revisiun parziala da la lescha da bajegiar – quai cun 479 cunter 138 vuschs. I va per il parc da mastergn planisà datiers da la staziun. Fin uss eri be lubì da stgaffir spazi economic sin quest areal ma cun questa revisiun parziala èsi uss era lubì da realisar spazi per cultura e sport.

Ils plans per quest areal han gia cumenzà avant 10 onns. La vischnanca aveva vendì l'areal ad ina gruppa d'investurs, damai che quella n'ha dentant realisà nagut, ha Schiers puspè cumprà enavos il terren avant dus onns. Uss fa in nov investur ina nov'emprova da crear in areal cun spazi d'industria e d'abitar – dentant er cun localitads per sport e cultura. La radunanza communala ha gia approvà la midada.

Tavau po engrondir chava da glera «Tola»

Cun 91,82% ha Tavau approvà dad engrondir la chava da glera «Tola» ed uschia la revisiun da la planisaziun locala. I va surtut per stgaffir là ina nova deponia per material da stgavament e da construcziun. Il parlament ha approvà unanimamain il project, er cun l'argumentaziun da porscher ina deponia en vischnanca per ch'il material na stoppia betg vegnir transportà davent.

A San Vittore datti novs indrizs da scola

Il souveran da San Vittore ha ditg Gea al credit da 7,1 milliuns francs per realisar ils novs indrizs da scola. Quai cun 257 cunter 120 vuschs. Il concept prevesa da mategnair il «spazi vid» da la plazza da ballape veglia dasperas e da construir edifizis plitost plats. Igl è previs da construir trais edifizis uschia che quels separan in pau il spazi da scola dal quartier abità dasperas. Uschia hai entamez dals trais edifizis in spazi avert sco er da la vart cun la veglia plazza da ballape. Quest nov center adempleschia ils principis da «Minergia».

Cun la construcziun da la nova scola pudess er vegnir schlià il problem che la vischnanca ha memia paucs plazs protegì en tschalers da protecziun per la populaziun. Quest dumber vegn prescrit da la Confederaziun ed il chantun sustegna las lavurs da construcziun finanzialmain.

RTR votaziuns 2022

Artitgels legids il pli savens

Scrollar a sanestra Scrollar a dretga