Il project cumpiglia trais plazzas da tennis per la stad. L’enviern vegn la plazza duvrada per ina patinera artifiziala. Gist sper las plazzas duessi dar gardarobas, indrizs sanitars, in magasin ed ina ustaria. Quella duess remplazzar l’ustaria existenta tar il runal da La Nars. Ussa duai vegnir inoltrada la dumonda da construcziun. La patinera ed l'ustaria duain esser pinadas sin l'enviern 2022/23. Il magasin e las plazzas da tennis per la stad 2023.
Il grond sustegn per il project mussia ch'il project «plazzas da sport La Nars» vegnia supportà da bleras uniuns, dal turissem e da l'economia en la val. Quai ha ditg il mastral Leo Thomann a la FMR. Ed era per Roland Kolb da la Cuminanza d'interess La Nars sa mussia tge ch'ins possia prestar sch'in e mintgin s'engascha.
In punct critic tar l'entir project è la situaziun da parcadis. Datiers dal nov center na datti betg avund plaz per blers parcadis. Tenor Leo Thomann vegn dentant gia sclerì la pussaivladad da far parcadis sin duas parcellas ch'en 200-300 meters davent dal center. Era per Roland Kolb n'è quai betg in impediment.
Tgi che dat hockey a Cuira en la Obere Au, sto era ir a pe in per tschient meters avant ch'el è en gardaroba.
