Engadin Ultra Trail - Per il giubileum da 5 onns in record da curridurs e curriduras

Sco gia l’onn passa attira l'Engadin Ultra Trail cun ses quatter trajects blers participants e participantas. En congual cun la quarta ediziun, pon ils organisaturs e las organisaturas enturn Reto Franziscus, il president da la societad purtadra, quintar cun bundant 30% dapli curridurs e curriduras.

Quest onn èsi 700 persunas per la 5 avla ediziun giubilara. Il pli lung dals trajects che maina sur 102 kilometers cun partenza e arrivada a Samedan, attira bundant 100 atlets ed atletas. Quels han temp 25 uras da cumplettar ella da venderdi a las 23.00 enfin sonda a mesanotg. En quest temp vegnan manadas tras eir las trais cursas pli curtas sur 16, 23 e 53 kilometers.

Mesiras da segirezza

Per ils curridurs e las curriduras da la pli lunga cursa ha l’organisaziun sper in reglament che prescriva l’equipamaint necessari per il traject, era il telefonin che mintgin e mintgina ha da purtar cun el u ella. Era vegnan ils participants e participantas equipads cun chips da GPS. Quai per ch'il team enturn Reto Franziscus haja adina la controlla e possia en cas d’in accident reagir svelt.

Era planisà han ins tut las quatter cursas uschia che ellas èn per gronda part accessiblas cun vehichels. Uschia duai tenor il president dal comité d’organisaziun vegnir procurà per la segirezza dals curridurs e las curriduras.

Impressiuns da l'onn passà

Segir mo in onn 

Era l'onn proxim duai l'Engadin Ultra Trail avair lieu. La finanziaziun saja segirada. E sche il trend da currer resta, n’ha Reto Franziscus betg tema ch'i vegnia stretg per sia occurrenza. 

Il material per ils posts da proviant e signalisar ils trajects

Ultimas lavurs

Dentant ha il president dal comité d’organisaziun era preparà e marcà ils trajects ensemen cun ils voluntaris e las voluntarias. Quest onn senza avair stuì spalar naiv sco l’onn passà.