In dals hotspots da la litschala da pestgadras e pestgaders en Grischun è stà sur onns l’En tranter Schlarigna e Samedan. Avant trais onns ha l’Uffizi da chatscha e pestga però constatà ch’ins ha pestgà bunamain 70% pli paucas litschalas en Engiadin’Ota.
Studi duai sclerir motivs
Perquai han ins lantschà in studi che duai sclerir d’ina vart ils motivs dal regress, da l’autra vart vul ins chattar or, sch’il pesch ha simplamain chattà novs lieus per viver, declera Linard Jäger, il survegliader da pestga en Engiadin’Ota.
Nus vain marcà divers peschs cun chips. Uschia pudain nus observar, nua che las litschalas van a fregar e nua ch'ellas han lur lieu da vita durant la frega ed er durant l’enviern.
Novs lieus da vita
Fin uss hajan ins constatà che la litschala haja chattà novs lieus per viver. Quai haja da far cun la renatiralisaziun da l’En tranter Schlarigna e Zuoz. Tenor Linard Jäger datti dentant pli paucas litschalas. Actualmain saja la populaziun en Engiadin’Ota però anc gronda avunda per sa mantegnair suletta.
