L’onn 2017 han las nov vischnancas da San Murezzan fin S-chanf decis da sustegnair il project d’ina serenera cuminaivla – l’ARA a S-chanf. In project gigantic per radund 76 milliuns francs. Be in onn pli tard, suenter ina planisaziun da 17 onns, han las lavurs da construcziun a l’ur da la vischnanca da S-chanf cumenzà, dapi passa in onn è ella en funcziun. La nova ARA a S-chanf remplazza las trais sereneras tranter Samedan e S-chanf, l'ARA SAX, ARA STAZ ed ARA Furnatsch.
Grond, modern ed economic
Sco las veglias sereneras, è er la nova ARA ina serenera che nettegia l’aua persa. L’installaziun da la nova serenera a S-chanf è però automatisada e vegn survegliada a moda digitala. Ella è ina da las pli grondas, modernas ed economicas sereneras da l’entira Svizra. Fabritgada è ella vegnida cun moduls flexibels, che laschassan engrondir l’implant cun singuls moduls. Durant il temp da Nadal e Bumaun riva la serenera pia da nettegiar l’aua persa da var 110'000 persunas.
Renatiralisaziun da sereneras existentas
Suenter l’avertura da la nova serenera a S-chanf han cumenza las lavurs da reconstrucziun da las anteriuras ARAs STAZ e SAX. Entant che l’ARA SAX a Bever è vegnida remplazzada cun in prà verd, ha la vischnanca da Schlarigna decis da far parcadis sin quel terren. Quellas lavurs duain esser terminadas l’onn 2024.
Cun la festa d’inauguraziun da la nova ARA a S-chanf, nua che la populaziun è vegnida envidada per dar in sguard davos las culissas, è quella uffizialmain en funcziun.
