Il cussegl communal da San Murezzan n'accepta betg la nova cunvegna da prestaziun cun la destinaziun turistica Engiadina San Murezzan SA. Quai ha decis il cussegl communal cun 10 cunter 5 vuschs. En avegnir duai la vischnanca rinforzar si’autonomitad e collavurar be pli parzialmain cun l’organisaziun turistica regiunala. Quella duai daventar per San Murezzan ina agentura d’incumbensas. Uschia possian ins collavurar cun il sistem da la pagina d’internet ubain dals posts d’infurmaziun. Las activitads e las resursas da la destinaziun duain percunter vegnir surdads al sectur turistic da la vischnanca, San Murezzan Turissem.
Quell’organisaziun duai vegnir separada suenter otg onns da la chanzlia communala. Quai ha decis il cussegl communal. San Murezzan aveva desditg il contract cun la destinaziun turistica l’onn 2020 cun la finamira d’elavurar in nov contract, pli effizient, che vala a partir da l’onn che vegn. En in proxim pass duain uss vegnir sclerids ils detagls da l’avegnir ensemen cun tut ils involvids. L'ultim pled en chapitel ha la populaziun. Quella decida questa stad davart il nov contract cun la destinaziun turistica.
