La dispita tranter il sindicat Unia e l'interpresa «Plan-B Kitchen» cuntinuescha. Sco che l'interpresa scriva en ina communicaziun èn quatter collavuraturs vegnids relaschads per immediat. Quai suenter ch'igl aveva dà l'emna passada in'acziun da protesta encunter las cundiziuns da lavur organisada da l'Unia.
Roberto Giovanoli, il mainafatschenta da Plan-B Kitchen argumentescha la relaschada da las quatter persunas cun il fatg ch'ellas hajan cuntrafatg a l'obligaziuns da fidaivladad – che prescritta en il Dretg d'obligaziun, artitgel 321. Quella scumonda acziuns che donnegian economicamain u ad autra moda l'interpresa.
La relaschada n'haja da far nagut cun activitads sindicalas. Ils collavuraturs sajan libers da s'engaschar sindicalmain – la finamira da questa acziun da protesta saja dentant sta da disfamar el e sia interpresa.
Tut auter vesa l'Unia la situaziun, sco ella scriva en in'atgna communicaziun. La lescha (Dretg d'obligaziuns, art. 336) lubeschia a collavuraturs e collavuraturas da sa participar ad activitads d'in sindicat. Quai cumpiglia era protestas u ina chauma. Relaschar persunas pervi da questa acziun cuntrafetschia perquai a la lescha.
Tgi che fa diever da ses dretgs e fa avis sin ina situaziun insupportabla na dastga betg vegnir chastià existenzialmain.
Per il manader da l'interpresa, Roberto Giovanoli, n'è questa acziun a San Murezzan dentant betg stada in'acziun da protesta legala dal sindicat. Ins sajan numnadamain sa radunà gia 10 minutas suenter il discurs cun el avant ses restaurant per protestar.
L'Unia n'ha mai gì in interess da propi chattar ina schliaziun per lur commembers.
Da las 11 persunas al lieu sajan ¾ stadas persunal da la Unia e betg collavuraturs u collavuraturas da Plan-B Kitchen, vegn el cità en la communicaziun da si'interpresa.
Era visà alloschi
In ulteriur punct ch'il sindicat crititgescha è che Plan-B Kitchen haja era visà als pertutgads l'alloschi che l'interpresa metta a disposiziun. E quai entaifer da trais dis. Era qua cuntrafetschia l'interpresa cleramain a la lescha, scriva l'Unia. Ins possia be visar in'abitaziun per immediat sch'il locatari u la locataria haja «donnegià fitg l'abitaziuns intenziunadamain».
Quest pass mussia cun tge metodas da squitsch ed emprovas da far tema che Giovanoli lavuria. Quest punct da critica na vegn betg menziunà en la reacziun da l'interpresa.
Tant l'Unia sco era Roberto Giovanoli èn da l'avis ch'els han raschun, Giovanoli scriva dentant ch'el saja pront da discurrer sur da las relaschadas sche l'Unia termineschia la campagna da disfamaziun.
L'Unia ha annunzià in'acziun da protest a Cuira per mesemna da mezdi. Plinavant preparia il sindicat in plant pervi da relaschadas nunlubidas.
L'entschatta da la dispita: Unia fa grevas renfatschas envers «Plan-B Kitchen»
A San Murezzan hai dà ils 16 da fanadur in inscunter tranter l'interpresa da gastronomia «Plan-B Kitchen», manada da Roberto Giovanoli, ed il sindicat per emploiads Unia. Quel fa grevas renfatschas cunter l'interpresa e rapporta da violaziuns sistematicas dals contracts da lavur.
L'Unia sa basa tar sias renfatschas sin indicaziuns da 13 collavuraturs e collavuraturas actualas, ubain er anteriuras. Concret vegnian manipuladas las uras da lavur prestadas, però vegnian era reducidas pajas arbitrariamain. Plinavant stoppia il persunal viver en alloschis surchargiads e stettia sut surveglianza da video ed audio permanenta – e quai senza consentiment.
Questas praticas violeschian ils dretgs da protecziun da datas e da lavur, di Danijela Dragicevic che maina la partiziun tgira collectiva da collavuraturas e collavuraturs tar la Unia (regiun Svizra Orientala-Grischun). A l'inscunter n'haja il manader da «Plan-B Kitchen» mussà pauca chapientscha e na saja betg pront da curreger la situaziun.
«Plan-B Kitchen» renviescha las renfatschas
Il manader da «Plan-B Kitchen» Roberto Giovanoli ha renvià la gronda part da las renfatschas da l'Unia. Quai en in'intervista cun il schurnal regiunal da radio SRF. Ina part da questas sajan novas per el , ulteriuras renfatschas sajan gia scleridas, di Giovanoli. Tantpli ch'il manaschi saja dacurt gia vegnì controllà dal post da surveglianza dal sindicat per gastronomia. Quel n'haja chattà nagins problems gravants.
Entant è resultà in ultimatum
Il sindicat Unia planisescha pass giuridics e pretenda controllas sistematicas en il sectur da gastronomia. La gronda fluctuaziun ed il dumber d'emploiads esters rendian la situaziun anc pli difficila. Danijela Dragicevic accentuescha la necessitad d'organisaziuns da controlla regiunalas per evitar cas sumegliants en l'avegnir. Suenter l'intervista vuleva l'Unia anc spetgar enfin il prim da settember, avant che far pass giuridics, e Roberto Giovanoli ha ditg d'examinar anc ina giada la situaziun e schliar eventuals problems.
Gia in di pli tard tunavi tut auter tar omaduas varts: La Unia renfatscha a Roberto Giovanoli da betg vulair chattar ina schliaziun senza dretgira. Da la vart da la «Plan-B Kitchen AG» na saja quai dentant insumma betg il cas. Il fazit per il mument è perquai: Pled cunter pled – quai para actualmain d'esser la situaziun tranter las duas partidas dal conflict.
Novitads, eveniments ed istorgias localas. Tut tge che curra e passa en l'Engiadina chattais vus qua.
Gastrogrischun tema per la reputaziun
Franz Sepp Caluori, il president da Gastrogrischun ha clers pleds per las reproschas da las collavuraturas ed ils collavuraturs envers la «Plan-B Kitchen AG». Franz Sepp Caluori n'è betg cuntent da talas renfatschas e tema per il renum da la branscha e da l'uniun da gastronomia.
Jau n'era insumma betg intgantà da quai. Nus lavurain vi da la reputaziun da la branscha, ed ussa datti talas renfatschas ad in commember da la suprastanza.
La suprastanza da Gastrogrischun na saja anc betg vegnida pledentada da las collavuraturas ed ils collavuraturs ch'hajan inditgà las renfatschas a l'Unia. Per il mument na vegnia l’uniun da gastronomia betg ad instradar insatge, sco il president declera.
Uffizi chantunal na piglia nagina posiziun uffiziala
In’autra instanza che responsabla per il dretg da lavur è l’Uffizi chantunal per industria, commerzi e lavur. Sche quel saja gia involvì en il cas actual, na dastga il manader da l’uffizi Gian Reto Caduff betg tradir. En general valia dentant che l'uffizi fetschia regularmain controllas en manaschis, sch’el haja survegnì indizis.