L'Unia sa basa tar sias renfatschas sin indicaziuns da 13 collavuraturs e collavuraturas actualas, ubain era anteriuras. Concret vegnian manipuladas las uras da lavur prestadas, però vegnian era reducidas pajas arbitrariamain. Plinavant stoppia il persunal viver en alloschis surchargiads e stettia sut surveglianza da video ed audio permanenta - e quai senza consentiment.
Questas praticas violeschian ils dretgs da protecziun da datas e da lavur, di Daniela Dragicevic che maina la partiziun tgira collectiva da collavuraturas e collavuraturs tar la Unia (regiun Grischun dal sid). A l'inscunter n'haja il manader da «Plan-B Kitchen» mussà pauca chapientscha e na saja betg pront da curreger la situaziun.
Plan-B Kitchen renviescha las renfatschas
Il manader da «Plan-B Kitchen» Roberto Giovanoli ha renvià la gronda part da las renfatschas da l'Unia. Quai en in'intervista cun il schurnal regiunal da radio SRF. Ina part da questas sajan ussa per el novas, ulteriuras renfatschas sajan gia scleridas, di Giovanoli. Tantpli che il manaschi saja dacurt gia vegnì controllà dal post da surveglianza dal sindicat per gastronomia. Quel n'haja chattà nagins problems gravants.
Entant è resultà in ultimatum
Il sindicat Unia planisescha pass giuridics e pretenda controllas sistematicas en il sectur da gastronomia. La gronda fluctuaziun ed il dumber d'emploiads esters rendian la situaziun anc pli difficila. Daniela Dragicevic accentuescha la necessitad d'organisaziuns da controlla regiunalas per evitar cas sumegliants en l'avegnir. Ed en il cas concret vul l'Unia anc spetgar enfin il 1. da settember, avant che far pass giuridics, e Roberto Giovanoli vul examinar anc ina giada la situaziun e schliar eventuals problems.
Novitads, eveniments ed istorgias localas. Tut tge che curra e passa en l'Engiadina chattais vus qua.
