La maschina da la societad «Mostaria Movibla» è en funcziun dapi l’onn passà. Entant saja la dumonda d'elavurar maila e producir ordlonder most creschida, uschia di Armon Mayer, il president da la societad.
Nus vulain porscher cun nossa mostaria mobila er en Engiadina la pussibilità da conservar la maila en furma liquida.
La maschina è buna dad elavurar radund 500 kilos fritga l’ura cun finalmain producir passa 70% most ordlonder. La maila vegn lavada sin ina remortga, suenter mulada, pressada e pastorisada cun ina temperatura dad 80 grads. Finalmain datti satgs da 5 u 10 liters cun most.
Grond gudogn n’è betg la finamira
Bunamain 20’000 kilos maila èn vegnids pressads ils davos onns en la regiun. Armon Mayer sperescha da pudair mantegnair quella quantitad. La finamira na saja betg da far in grond gudogn, ma da mantegnair la pussaivladad da realisar most en la regiun. Plinavant speresch’ins era da promover la producziun da fritga.
Il project ch’ha custà radund 80’000 francs è vegni sustegnì finanzialmain dal chantun, da la vischnanca da Scuol ma era da l’Agid da muntogna Svizzer.
