Il chantun sustegna il project da proveder la regiun Engiadina Bassa/Val Müstair cun bindel ultralad sin basa d’ina infrastructura da fibra da vaider. La regenza ha concedì ina contribuziun chantunala da maximalmain 1,89 milliuns francs. Ils custs totals muntian a bunamain 4 milliuns francs.
Durant che las vischnancas Scuol, Valsot e Zernez han gia previs da collavurar cun l'interpresa da provediment d'energia «Energia Engiadina», vegnan las vischnancas da Samnaun e Val Müstair anc a concretisar il provediment planisà.
In provediment da las regiuns cun colliaziuns d'internet en il sectur dal bindel ultralad saja impurtant per promover vinavant la transfurmaziun digitala en il Grischun. La dumonda suenter pli grondas capacitads da bindel ultralad haja prendì tiers. Per il chantun saja impurtant che las regiuns hajan ina buna qualitad da la rait, cunzunt er per che las interpresas possian lavurar al lieu e per las abitantas ed abitants.
