En il rom da la Terra Raetica collavuran las trais regiuns da cunfin Tirol, Tirol dal Sid e regiun Engiadina Bassa / Val Müstair (EBVM) dapi il 2007. Ils projects èn vegnids realisads dapi lura unicamain sur il program «Interreg Italia-Austria» cun la regiun EBVM sco partenari associà.
Da nov porscha il program «Interreg Italia-Svizra» la pussaivladad da realisar projects pitschens (cun in preventiv total fin var 200'000 francs) en la Terra Raetica. Per l'emprima giada èsi uschia era pussaivel a partenaris da la regiun EBVM d'iniziar e realisar en ina posiziun dominanta projects pitschens transcunfinals.
Finamiras e plivalur da la collavuraziun transcunfinala
Ina finamira centrala dal fond per projects pitschens è da promover sur ils cunfins ils potenzials turistics ed economics da las duas regiuns. Il martgà da lavur sco era las purschidas turisticas da la regiun EBVM e dal Vnuost èn colliadas stretgamain ina cun l'autra. Quai suttastritga la necessitad da projects cuminaivels.
Interprendiders, organisaziuns turisticas ed auters purtaders da prestaziuns èn dumandads da sviluppar ideas innovativas che creeschan ina plivalur per tuttas duas varts. En il rom da la metoda trilaterala pon era projects cun participaziun da l'Austria (Tirol) vegnir promovids per rinforzar la regiun linguistica dals trais pajais en total.
Ideas concretas per projects e champs tematics
Las ideas per il project en il rom dal fond cumpiglian differents temas – tranter auter il passlung, sport da velo e discgolf. Questas ideas duain gidar ad engrondir u a concepir da nov purschidas turisticas transcunfinalas.
In highlight spezial è il svilup ch'è planisà d'ina app cuminaivla a chaschun dal giubileum da 200 onns dal Stelvio che metta a disposiziun infurmaziuns e purschidas en connex cun la via da muntogna. In ulteriur tema central è la furmaziun professiunala, nua ch'i duain vegnir sviluppadas pussaivladads da cumbatter la mancanza da spezialists tras il barat tranter las scolas professiunalas.
Finanziaziun e sustegn tras il chantun Grischun
Ils projects che contribueschan cumprovadamain a la valurisaziun vegnan sustegnids finanzialmain da la vart svizra. Il chantun Grischun metta a disposiziun meds finanzials en il rom da la nova politica regiunala (NPR). La Regiun EBVM ha la funcziun d'in post da consultaziun per purtaders da projects che vulan realisar lur ideas. Ils emprims projects duain vegnir approvads l'atun e silsuenter realisads.