Siglir tar il cuntegn

Header

audio
Institut autalpin Ftan: cunvegna per finanziar classas da sport
Or da Actualitad dals 24.11.2022. Bild: RTR
laschar ir. Durada: 2 minutas 22 Secundas.
cuntegn

Engiadina Bassa Val Müstair La regiun sustegna era en avegnir la classa da sport

La Regiun Engiadina Bassa Val Müstair ha dà glisch verda ad ina cunvegna cun l'Institut autalpin Ftan per sustegnair la classa da sport.

Dapi l’onn 2022 appartegna l’Institut autalpin Ftan a la Dulwich College International cun sez en l'Engalterra. Causa quai ston ussa era las cunvegnas tranter la Regiun Engiadina Bassa Val Müstair e la scola media vegnir adattadas.

En avegnir na datti nagina scola secundara pli a l'institut. Tuttina vul la nova possessura pussibilitar a tut las sportistas e sportists interessads vi dal sport da skis, snowboard u passlung da sa participar a la classa da sport. Quai independentamain sch’els van a scola a l'institut u betg.

Proposta da l'Institut autalpin Ftan

Tenor l’institut vegn la classa da sport a custar en avegnir radund 800'000 francs ad onn. Da quels surpiglian els sez 300'000 francs. La Regiun Engiadina Bassa Val Müstair paja in import da sochel da 100’000 francs.

Las sportistas e sportists che sa participeschan a la classa da sport ston pajar mintgin 10’000 francs. Per sustegnair las sportistas e sportists indigens sa participescha la regiun cun ulteriurs 8’000 per mintgin. Actualmain fan 32 atletas ed atlets indigens part da la classa da sport, uschia che quai munta a 256’000 francs dasper l’import da sochel.

Cunvegna provisorica per ils proxims dus onns

La conferenza da presidents da la Regiun Engiadina Bassa Val Müstair va perina cun la cunvegna che duess valair per ils onns 2023/24. Durant quest temp duess vegnir stipulada ina cunvegna definitiva.

RTR actualitad

Artitgels legids il pli savens

Scrollar a sanestra Scrollar a dretga