Il studio da fitness «Origym» porscha trenaments da sport classics, joga e gimnastica. Cun sia purschida varianta e cun in'infrastructura professiunala attira il studio a Scuol sportistas e sportists da hobi, talents da sport e persunas e gruppas professiunalas. Il «Origym» duai contribuir a la regiun ina plivalur e manar tar plazzas da lavur attractivas. Il studio da fitness exsista dapi l’onn 2020, sa chatta en il Bogn Engiadina Scuol e vegn manà dad Arno Galmarini.
Il premi d’innovaziun è dotà cun 3’000 francs e vegn surdà mintg’onn da la conferenza da presidents da la Regiun Engiadina Bassa Val Müstair a firmas che realiseschan ideas a moda originala e persistenta e genereschan uschia ina plivalur sociala.
