Siglir tar il cuntegn

Header

video
Nov cussegl administrativ da la destinaziun turistica Engiadina San Murezzan
Or da Telesguard dals 15.05.2020.
laschar ir
cuntegn

Engiadina San Murezzan Il nov cussegl administrativ procura per ina surpraisa

Malgrà che la radunanza generala ha elegì tut ils sis candidats proponids en il cussegl administrativ, fan be trais part da quel. Quai ha il nov cussegl decidì en sia emprima sesida.

Il nov cussegl administrativ da la Engiadina San Murezzan Turissem SA sa cumpona da:

  • Fredi Gmür, represchentant da la parahotellaria
  • Claudio Dietrich, represchentant da l'hotellaria e las vischnancas. El ha sco unic fatg part dal vegl cussegl administrativ.
  • Kurt Bobst, represchentant da l'uniun da commerzi
Il nov cussegl d'administraziun: Da san: Fredi Gmür, Claudio Dietrich und Kurt Bobst.
Legenda: Il nov cussegl d'administraziun Da san.: Fredi Gmür, Claudio Dietrich und Kurt Bobst. MAD, Engiadina San Murezzan Turissem SA

La radunanza generala aveva dentant era elegì:

  • Felix Ehrat, sco represchentant da las vischnancas
  • Richard Leuenberger, sco represchentant da l'hotellaria
  • Marcel Bührer, sco represchentant da las pendicularas

Uss sa cumpona il cussegl administrativ da la destinaziun Engiadina San Murezzan be pli da trais commembers. Sch'il dumber da quels vegn puspè schlargià, vegnia decidì pli tard, uschia la curta communicaziun da l'interpresa.

Ina da las lezias principalas dal nov cussegl èsi, da crear las premissas structuralas, organisatoricas e finanzialas per drizzar or da nov l'organisaziun da turissem. Quai suenter ils virivaris dals davos mais. Vinavant duess il cussegl administrativ examinar la strategia actuala e megliurar la communicaziun tranter ils differents players.

Defizit da 700'000 francs

La radunanza generala ha ultra da quai approvà il quint final da l'organisaziun che serra cun in minus da quasi 700'000 francs. Ed ella ha era deliberà la revisiun dal reglament d'organisaziun che na reparta la responsabladad betg be sin il CEO, mabain sin l'entira direcziun.

Il commentari en scrit

Textbox aufklappenTextbox zuklappen

Il proxim chapitel da la destinaziun turistica, cumenza in pau auter che pensà.

I n’è betg uschia che l’elecziun dal nov cussegl administrativ ha manà la quietezza giavischada, almain per entant betg.

La radunanza ha elegì 6 novs commembers en il gremi. In gremi che sa constituescha sez. Che l'emprim inscunter da quel giess gia en tut in’autra direcziun – numnadamain be pli cun in cussegl administrativ da trais – cun quai n’avess pli probabel nagin fatg quint.

La raschun per quella decisiun – che para d’avair chaschunà davos las culissas dapli discussiuns che quai che vegn communitgà uffizialmain – numnadamain da lavurar si tut il passà en trais – pli effizient e svelt, quai fa senn. Be uschia vegni insumma ad esser pussibel da metter la basa per la stabilitad d’ina organisaziun per il mument detg falombra.

Da metter en dumonda è però quant professiunal che la gruppa da lavur ord il ravugl dals presidents communals, ha preparà ils ultims mais la basa per pudair eleger in nov cussegl administrativ. Uss cumenza numnadamain tut puspè da l'entschatta.

La destinaziun ha segir pers fin oz ina pluna temp, temp per eleger per exempel finalmain in nov CEO ed er per eliminar il donn dad image che la destinaziun ha subì ils ultims mais.

Sche la strategia è propi stada la dretga, e maina finalmain er ad ina fin, quai sto uss cumprovar il nov cussegl administrativ da la destinaziun turistica Engiadina San Murezzan.

Ils virivaris dals davos mais

RTR novitads 14:00

Artitgels legids il pli savens

Scrollar a sanestra Scrollar a dretga